Elektron soliq xizmatlari portali ishga tushdi

16:49, 20 aprel

Internetda davlat soliq xizmati organlarining yangi elektron soliq xizmatlari portali – my.soliq.uz test rejimida ishga tushirildi. 

O`zbekiston Respublikasi Davlat soliq qo`mitasi axborot xizmati ma`lumotlariga ko`ra, loyihaning asosiy maqsadi – davlat soliq xizmati organlari tomonidan aholi va tadbirkorlik sub`ektlariga ko`rsatiladigan elektron davlat xizmatlarini takomillashtirish, soliq to`lovchilarga qo`shimcha qulayliklar yaratishdan iborat.

Zarur xizmatni tez va oson qidirish mumkinligi portalning muhim qulayligi hisoblanadi. Bunda O`zbekiston Respublikasining «Elektron hukumat to`g`risida»gi qonuni talablaridan kelib chiqib, davlat soliq xizmati organlarining barcha elektron davlat xizmatlari interaktiv va axborot davlat xizmatlariga saralangan. Ularni qidirishni yanada soddalashtirish maqsadida murojaat va hisobotlarni yuborish, ro`yxatga olish, soliqlarni hisoblash va ma`lumotnomalar olish kabi xizmat yo`nalishlariga ajratilgan. Jismoniy va yuridik shaxslar hamda yakka tartibdagi tadbirkorlar uchun xizmatlarni tanlash imkoniyatlari mavjud.

Yana bir yangilik bu – barcha toifadagi soliq to`lovchilar uchun alohida shaxsiy kabinet ochilgan. Shaxsiy kabinetda bir qancha qulayliklar yaratilgan. Jumladan, «Shaxsiy ma`lumotlar», «Hisob-kitoblarning joriy holati», «Soliq organlari bilan yozishmalar», «Foydali ma`lumotlar» kabi mavzuga oid xizmatlar qulay navigasiyali bloklarga ajratilgan.

Soliq to`lovchilar har bir xizmat bo`yicha o`z fikr va baholarini qoldirishi, soliq organlari esa soliq to`lovchilarning fikrlarini o`rganishi, taklif va e`tirozlarini ko`rib chiqish imkoniyatiga ega.

Bugungi kunda davlat soliq xizmati organlari tomonidan 26 turdagi elektron davlat xizmati ko`rsatilmoqda, 10 yangi xizmat test rejimida taqdim etilmoqda. Soliq to`lovchi toifasi va joylashgan joyidan qat`i nazar barcha xizmatlardan foydalanish imkoniyatiga ega.

Ish jarayonini kuzatish va kamchiliklarni bartaraf etish maqsadida my.soliq.uz portali aprel oyida test rejimida ishlaydi. Ushbu davr mobaynida foydalanuvchilar oldingi tizimdan ham foydalanishlari mumkin.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!