Olimpiada g`oliblarini pul mukofotlari bilan taqdirlash to`g`risida Prezident farmoyishi imzolandi

22:27, 23 avgust

23 avgust kuni O`zbekiston Prezidenti Olimpiada g`oliblarini pul mukofotlari bilan taqdirlash to`g`risida farmoyish imzoladi.

Mamlakatimizda jismoniy tarbiya va sportni rivojlantirish, yoshlar o`rtasida olimpiada harakatini targ`ib etishdagi faol ishtiroki, Rio-de-Janeyro shahrida (Braziliya) bo`lib o`tgan XXXI yozgi Olimpiada o`yinlaridagi yuksak sport mahorati va mardligi, xalqaro sport maydonlarida O`zbekistonning nufuzi va obro`-e`tiborini oshirishga qo`shgan katta hissasi uchun hamda O`zbekiston Respublikasi Prezidentining 2016 yil 12 iyuldagi PQ-2558-sonli qaroriga muvofiq: 

1. Quyidagi sportchilar biryo`la to`lanadigan pul mukofoti bilan taqdirlansinlar: 

oltin medal olgani uchun

har biri 200 000 AQSh dollari bilan:

Nurudinov Ruslan Shamilevich – og`ir atletika bo`yicha terma jamoa a`zosi; 

Do`smatov Xasanboy Marfjon o`g`li – boks bo`yicha terma jamoa a`zosi; 

Zoirov Shaxobidin Shokirovich – boks bo`yicha terma jamoa a`zosi; 

Gaibnazarov Fazliddin Xasanbaevich – boks bo`yicha terma jamoa a`zosi; 

kumush medal olgani uchun

har biri 100 000 AQSh dollari bilan:

Giyasov Shaxram Djamshedovich – boks bo`yicha terma jamoa a`zosi; 

Meliqo`ziev Bektemir Ro`zmatjon o`g`li – boks bo`yicha terma jamoa a`zosi; 

bronza medali olgani uchun

har biri 75 000 AQSh dollari bilan:

Axmadaliev Murodjon Qahor o`g`li – boks bo`yicha terma jamoa a`zosi; 

Tulaganov Rustam To`lqin o`g`li – boks bo`yicha terma jamoa a`zosi; 

Sobirov Rishod Rashidovich – dzyudo bo`yicha terma jamoa a`zosi; 

Urozboev Diyorbek Baxtiyor o`g`li – dzyudo bo`yicha terma jamoa a`zosi; 

Tasmuradov Elmurat Zulipxar-uli – yunon-rum kurashi bo`yicha terma jamoa a`zosi; 

Navruzov Ixtiyor Karimovich – erkin kurash bo`yicha terma jamoa a`zosi; 

Ibragimov Magomed Idrisovich – erkin kurash bo`yicha terma jamoa a`zosi. 

2. Belgilab qo`yilsinki, pul mukofotlarini to`lash O`zbekiston Respublikasi Tashqi iqtisodiy faoliyat milliy banki tomonidan xorijiy valyutada – AQSh dollarida, bankda jismoniy shaxslar uchun belgilangan tartibda ochiladigan depozit hisobraqamlaridan, soliq undirilmasdan amalga oshiriladi. 

3. O`zbekiston Respublikasi Moliya vazirligi ushbu maqsadlar uchun zarur pul mablag`lari o`z vaqtida ajratilishini ta`minlasin, O`zbekiston Respublikasi Markaziy banki esa O`zbekiston Respublikasi Tashqi iqtisodiy faoliyat Milliy banki bilan birgalikda ajratilgan mablag`larni O`zbekiston Respublikasi Madaniyat va sport ishlari vazirligining buyurtmanomalari bo`yicha belgilangan tartibda konvertasiya qilsin. 

Mazkur farmoyishning bajarilishini nazorat qilish O`zbekiston Respublikasining Bosh vaziri Sh.Mirziyoev zimmasiga yuklatildi.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!