Qaynonangizning ko`ngil qulfi uchun 7 kalit

11:56, 21 noyabr

Qaynonaga yoqish uchun tadbir qilish ayb emas, bil`aks bu juda zarur. Boshida sun`iyroqdek tuyulsa-da, bora-bora qaynonangizning ko`ngil qulflariga kalit bo`layotgan ishlaringiz o`zingizga rohat bag`ishlaydi. Keling, bu borada sizga opalik, singillik, dugonalik qilay... Yugur-yugur, osh-ovqat, kir yuvish, dazmollashdan tashqari іar kunlik qoidangiz bo`lsin. Masalan…

Dushanba

Ishlaydiganlar uchun og`ir kun. Yotar payti iliq vanna hozirlab, ichiga tuz va gulchalar soling. Eshikdan qaltirabgina kelgan qaynonangizga issiqqina choy damlaguningizcha bi-i-i-r yayrab chiqishni taklif qiling.

Seshanba

Bu kun irim-sirimlarga ishonadiganlar tirnoq, sochlarini oldirishadi. Qaynonangiz ham istisno bo`lmasa kerak. Shunday bo`lmasa ham qaychi, arracha solingan karmoningizni olib, manikyur-pedikyur xizmati tashkil qiling.

Chorshanba

Qaynonangizga oxori to`kilmagan ko`ylak kiydirib, sochlarini tarab, orasta qilib, biror dugonasini mehmonga chaqiring. Og`ziga yoqadigan pishiriq bilan siylang.

Payshanba

Albatta palovxonto`ra kuni. Bu safar uni aynan qaynonangizning resepti asosida tayyorlang. Erinmasdan birma-bir aytib berishini iltimos qiling.

Juma

Ertalabdan yaxshi kayfiyat bilan xayrli kun tilang. Radio murvatini eski ashulalarga burab, qaynonangizning xonasini yaxshilab shamollating. Deraza oynasi, pollarni yuvib, yotadigan divani ustiga yangi choyshab, yostiqjild solib qo`ying.

Shanba

Dam olish kunlari bolalar uyda bo`ladi. Qaynonangizning o`zi yoqtiradigan, yoshligida yod olgan she`ru matallari bordir. Kichkintoylarni ham, qaynongizni ham xushnud etishni istasangiz, u kishida bu kun uyingizda ma`rifat darsi o`tib berishini iltimos qiling.

Yakshanba

Qaynonangizni oilaviy mehmondorchilik, konsert, teatr tomoshalariga olib borib, o`zingiz ham bir yo`la dam oling.

Xullas, kishining ko`nglini olaman desangiz, qancha-qancha tadbirlar o`ylab topish mumkin. Asosiysi­ — shuni istashda! 

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!