2016 yildan davlat hokimiyati va boshqaruvi organlarining «Ochiqlik indeksi» e`lon qilib boriladi

05:43, 24 fevral 2016

O`zbekiston Respublikasi Oliy Majlisi Qonunchilik palatasida davlat hokimiyati va boshqaruvi organlari faoliyatining ochiqligini ta`minlashda ommaviy axborot vositalarining roliga bag`ishlangan seminar bo`lib o`tdi. 

O`zbekiston Respublikasi Oliy Majlisi Qonunchilik palatasining Axborot va kommunikasiya texnologiyalari masalalari qo`mitasi tomonidan tashkil etilgan tadbirda parlament a`zolari, vazirlik va idoralarning axborot xizmatlari vakillari, olimlar, jurnalistlar ishtirok etdi. 

Bugungi kunda yurtimizda bir ming to`rt yuzdan ko`proq ommaviy axborot vositalari faoliyat yuritmoqda. Ularning oltmish foizga yaqini nodavlat ommaviy axborot vositalaridir. Davlat hokimiyati va boshqaruvi organlarining axborot manbalari ham yildan-yilga takomillashmoqda. 

Seminar ishtirokchilari davlat hokimiyati va boshqaruvi organlari faoliyati ochiqligi bo`yicha monitoring olib borish va uning baholash usullari bilan tanishtirildi. 

– Qonunchiligimizga muvofiq, joriy yildan boshlab davlat hokimiyati va boshqaruvi organlarining ochiqlik bo`yicha vazifalarni amalga oshirish darajasini baholovchi «ochiqlik indeksi» e`lon qilib boriladi, – deydi O`zbekiston Respublikasi Oliy Majlisi Qonunchilik palatasi deputati Rasul Kusherboev. – Bu jarayonda reyting baholashni tashkil etishda davlat organlarining ommaviy axborot vositalari, fuqarolik institutlari bilan hamkorligi alohida mezon etib belgilandi. 

Seminarda davlat hokimiyati va boshqaruvi organlarining ochiqligini ta`minlashda axborot xizmatlarining roli, mamlakatimizda amalga oshirilayotgan siyosiy, ijtimoiy-iqtisodiy islohotlardan aholining xabardorligini oshirishda matbuot xizmatlari va jurnalistlarning o`rniga doir ma`ruzalar tinglandi. 

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!