Долзарб мавзулар Халқ билан мулоқот йили

12 январь – “Ватанга қасамёд” монументи очилган кун

Бўлимлар: Жамият
Теглар:
Добавлено: 12.01.2016, 13:26

12 январь – “Ватанга қасамёд” монументи очилган кун.

Президентимиз Ислом Каримов ғояси ва ташаббуси билан Тошкент шаҳрида барпо этилган «Ватанга қасамёд» монументи эл-юртимизнинг Ватан ҳимоячиларига чуқур ҳурмат-эҳтироми, муҳаббатининг ифодасидир. Бу гўзал мажмуада аскар давлатимиз байроғини кўзига суртиб, Ватан ҳимояси учун доимо тайёрлигини билдириб, тиз чўкиб қасамёд қилаётир. Унинг елкаси узра мард ва жасур ўғлонни бағрида авайлаб ўстирган Ватан тимсоли – мунис ва мўътабар она ҳарбий хизматга отланган фарзандини дуо қилиб, унга оқ йўл тиламоқда. 

Биз орият ва ғурурни ҳамма нарсадан устун қўядиган, лафзи ҳалолликни шараф деб биладиган, бир сўзли халқмиз. Шундай экан, фарзандларимиз – Ватан ҳимоячиларининг қасамёд қабул қилиш маросими шунчаки расмий тадбир эмас. Бу асл ўғлонларимиз, мард ва жасур йигитларнинг ўз халқига, Ватанига, Президентига, ота-онасига бераётган ваъдаси, лафзидир. 

"Ватанга қасамёд" монументи пойидан гулчамбарлар аримайди. Ватан ҳимоячилари куни байрами муносабати билан бу ерга ташриф буюрувчилар сафи янада кўпайган. Улар орасида йигитлик бурчини ўтаётган аскару офицерлар, олий ҳарбий таълим муассасалари курсантлари, умумтаълим мактаблари, лицей ва коллежлар ўқувчилари, олий ўқув юртлари талабалари, ота-оналар, пойтахтимиз меҳмонларини кўриш мумкин. 

 “Ватанга қасамёд” монументи ёшларимизни она юртга меҳр-муҳаббат, садоқат, мардлик ва жасорат руҳида тарбиялашда муҳим аҳамият касб этмоқда. Зеро, Ватанни кўз қорачиғидек асраш, уни ҳимоя қилиш мамлакатимизда яшаётган ҳар бир фуқаронинг муқаддас ва шарафли бурчидир.

 

Google+
WhatsApp
VK
Telegram

Комментарии