Ташкент +36° Mon 10:51
Долзарб мавзулар Фото

ИСЛОВОТХОНАГА АЙЛАНТИРИЛГАН МЕҲМОНХОНА

Бўлимлар: ЖИНОЯТ
Теглар:
Добавлено: 10.01.2018, 23:27

Асқар (исм-шарифлар ўзгартирилган) пойтахтдаги меҳмонхоналардан бирида маъмур лавозимида ишларди. Меҳмонхона маъмури деган лавозимда шунча пул ишлаб топиш мумкинлигини хаёлига ҳам келтирмаганди. “Қаловини топсанг қор ҳам ёнади”, деганларидай, лавозимидан фойдаланиб, анчагина пул ишлади. Аммо ҳаром йўл билан топилган пуллар кимга буюрибди дейсиз?

Одатдаги кунларнинг бирида Асқар ишга отланди. Иш жойига етиб келгач, навбатчиликни қабул қилди. Бирин-кетин меҳмонхонага келган меҳмонларни ҳужжатларини кўриб, қабул қила бошлади. Кўзи олма-кесак териб турган бир эркак эътиборини тортди. Унинг нима мақсадда ташриф буюрганини тажрибали ходим сифатида тушуниб, мийиғида жилмайиб қўйди.

– Келинг, ака, хизмат? – деб сўради у навбати етиб келган эркакдан.

– Меҳмонхоналарингни таърифини эшитиб, бир дам олиб кетай, деб келгандим, – деди эркак маъноли қилиб.

– Манзилни тўғри топиб келибсиз, фақат...

– Тушунарли, қанча бўлади?

– Тушунган одамни садағаси кетсанг арзийди. Пулини тўлаб қўйсангиз ҳамма шароитни муҳайё қиламан... Қизлар ҳам бор, – деди Анвар.

У эркак билан савдолашиб, 90.000 сўм эвазига хоналардан бирининг эшигини очиб, йўлак бошида турган аёлларга ишора қилди:

– Қизларни ўзингиз рози қиласиз.

Анвар осонгина пул топишнинг ҳадисини олгандан кейин меҳмонхонага ташриф буюрадиган эркакларни “Меҳмонхонага келган фуқароларни қайд этиш китоби”га қайд қилмасдан, хизмати эвазига улардан 90.000 сўмдан то 120.000 сўмгача пул олиб, фоҳишалар билан жинсий алоқада бўлиш учун шароит беришни ўзига касб қилиб олди. У сувдай оқиб келаётган текин пулларни кўргач, уларнинг миқдорини янада ошириш мақсадида меҳмонхона олдида туриб, таксичилик қиладиган ҳайдовчилардан бири Нурали билан ҳамкорликни йўлга қўйди.

– Нурали, баъзида меҳмонхонага келган эркакларга қизлар етишмай қоляпти, шунга керакли пайтларда уларни топиб келсангиз анча ёрдам қилган бўлардингиз. Пулидан ташвиш тортманг, рози қиламан, – деди Анвар.

“Лўлининг эшагини суғориб, пулини ол” мақолини ўзига шиор қилиб олган Нуралига бу гап мойдай ёқди. “Қайси йўл билан бўлса ҳам пул топсам бўлди-да!” деб ўйлади. Шундан кейин у меҳмонхонага келган эркакларнинг илтимосига кўра, фоҳиша аёллар доимий равишда тўпланиб турадиган жойлардан “енгил табиатли аёлларни меҳмонхонага ташиш хизмати” ни йўлга қўйди.

Анварнинг иши гуркираб ривожланиб кетди, чўнтагини қаппайтираётган сўмлар камдай кўриниб, уларни долларга айлантириш ғояси туғилди. У шундай хаёлда юрган кунларининг бирида “караоке кўнгил очар масканлар”идан бирининг раҳбари билан танишиб қолди. Раҳбарнинг исми Одилжон бўлиб, Анвар билан танишганидан боши кўкка етди. Суҳбат жараёнида уларнинг ҳамфикр, ҳаммаслак одам эканликлари маълум бўлди. Одилжон Анварга ўзи раҳбарлик қилаётган маскан кечки соат 18.00 дан тунгги 03.00га қадар ишлашини, у ерга асосан чет эллик — хитойлик ва кореялик эркаклар ташриф буюришини, уларнинг меҳмонхонада қизлар билан дам олишларига шароит яратиб берса, Анварга доллар ҳисобида пул тўлашини билдирди. Одилжоннинг бу гапидан Анвар қармоғига олтин балиқ илинган одамдай хурсанд бўлиб кетди.

Шундан кейин Одилжон “караоке кўнгил очар маскани”га шаҳвоний мақсадларда фойдаланиш, аёлларни “официант” ниқобида остида ёллаш, уларни эксплуатация қилиш учун корейс миллатига мансуб Маринани иш-юритувчи менежер қилиб ишга олди. “Кўнгил очар маскан” мижозларини меҳмонхонага ташиш учун такси хизмати ҳам йўлга қўйилиб, ҳайдовчилар ҳам тайинланди. Шу тариқа уюшган жиноий гуруҳга асос солинди. Анвар ҳар бир меҳмонга ажратилган хона учун 50 доллардан, таксичилар эса 10 доллардан хизмат ҳақи оладиган бўлди.

“Кўза кунда эмас, кунида синади”, деганларидай, Анварнинг устидан тегишли идораларга қилинган шикоятдан кейин у навбатчилик қилаётган бир кечанинг ўзида 16 нафар эркак ва 16 нафар аёлга, уларни “Меҳмонхонага келган фуқароларни қабул қилиш” китобига қайд этмасдан, ноқонуний равишда хоналар ажратгани маълум бўлди. Унинг сейфидан тегишли тартибда меҳмонхона ғазнасига кирим қилинмаган 3.523.000 сўм ва 500 доллар далилий ашё сифатида олинди. Анвар Н. Одилжон А. ва уюшган гуруҳнинг барча аъзолари Ўз.ЖКнинг 131-135 моддаларига асосан тегишли жазоларни олишди.

Лола ШОИМОВА

Google+
WhatsApp
VK
Telegram

Комментарии