Ташкент +23° Mon 15:09
Долзарб мавзулар Фото

Фитнес-мураббийдан 5 саволга 5 жавоб

Бўлимлар: СУҒДИЁНА
Теглар:
Добавлено: 07.02.2018, 08:08

Таҳририятимизга қўнғироқ қилган аёллар, кўпинча, тажрибали фитнес мураббийдан ўзларини қизиқтирган саволларга жавоб олиш ниятида эканликларини айтишади. Бугун ана шундай саволларни жамлаб, мутахассисга йўлладик ва керакли жавобларни олдик.

Барно Каримова, соғломлаштириш-жисмоний тарбия мураббийи.

«ҲАРАКАТ ҚИЛЯПМАН-У, ОЗМАЁТГАНДЕКМАН...»

— Фитнес машғулотларига қатнай бошлаганимга энди икки ҳафта бўлди. Натижасини қачон сезаман? Ҳозирча ҳеч бир ўзгариш йўқдек...

Матлуба Жўраева, Андижон вилояти.

— Машғулотларга қатнашга аҳд қилган экансиз, аввало, бундан мақсад нима эканлигини ўзингиз учун аниқлаб олинг: қоматингиздаги камчиликларни тузатмоқчимисиз, мушак ҳажмини ўстирмоқчимисиз, жисмонан бақувват бўлмоқчимисиз ёки шунчаки соғлом бўлиш учун қатнаяпсизми? Тезроқ озиб кетсам эди, дейиш ўрнига қанча килограммдан халос бўлиш, қоматингиздаги муаммоли жойлар устида ишлаш ҳақида ўйланг. Яна сабрли бўлишни ўрганишингиз керак. Икки-уч машқнинг ўзидаёқ мўъжиза кутиш у қадар тўғри эмас.

«ОЁҒИМ ОҒРИБ ҚОЛДИ...»

— Машқ пайтида оёғим мушаклари жароҳатланди. Орадан икки ҳафта ўтса ҳам оғриқ тўхтамаяпти. Буни қандай тузатиш мумкин?

Раъно Шомирзаева, Яккабоғ тумани.

Имкон қадар оғриётган оёқни асранг. Ҳозирча камроқ яёв юринг, иш пайтида сиқиб турадиган пойабзални ечиб қўйганингиз маъқул. Кечқурунлари уйқу олдидан ванна қабул қилинг: тоғорага иссиқ сув қуйиб, денгиз тузидан бир сиқим қўшинг-да, 15-20 дақиқа оёғингизни солиб ўтиринг. Тузли сув мушакларни анчагина бўшаштиради. Ваннадан кейин ўсимлик ёғи билан уқаланг. Мойли уқалаш жароҳатланган тўқималар тикланишини тезлаштиради. Бир ҳафта, ўн кун шундай муолажа қилсангиз, оғриқдан асар ҳам қолмайди.

«МАШҒУЛОТЛАРНИ ТЎХТАТМОҚЧИМАН»

— Икки-уч йилдан бери уйда ритмик машқлар билан шуғулланаман. Лекин кейинги пайтда машқ деса юрагим безиллайдиган бўлиб қолди. Эриняпман. Нима қилсам экан, вақтинча шуғулланмай турганим маъқулмикин?

Моҳина Асланова,Тошкент шаҳри.

Жисмоний фаоллик вазнни камайтириб, кайфиятга ижобий таъсир кўрсатиши билан бирга мушаклар ишини, ҳазм аъзолари, иммун тизим фаолиятини яхшилайди, организмда моддалар алмашинувини фаоллаштиради. Шунинг учун доимий шуғулланиб юрган бўлсангиз, бундан кейин ҳам давом эттирганингиз маъқул: организм бунга анчагина кўникиб қолган. Агар машқлардан зериккан бўлсангиз, бир ҳафта, ўн кун дам олинг-да, сўнг фитнес-залга боринг. У ерда гуруҳ-гуруҳ бўлиб шуғулланасиз ва машғулот жараёни зерикарли туйилмайди. Шерикларингизнинг фаоллиги, ҳаракатчанлиги сизни ҳам ортда қолмасликка ундайди, кучингизга куч қўшади. Бундан ташқари, фитнес-залда мураббий сизнинг ҳар бир хатти-ҳаракатингизни назорат қилиб туради. Бу билан машқларни тўғри, ўз ўрнида бажариб, кутилган натижага эришасиз.

«ҚОМАТИМИЗ ҚЎПОЛ ТУС ОЛИБ КЕТСА-Я!..»

— Биз, уч овсин фитнесга қатнаяпмиз. Лекин ўйлаб қолдик: жисмоний машқлар билан доимий шуғулланиш қоматни бузмайдими? Мушаклари ўсиб, ташқи кўриниши қўполлашган спортчи қизлардек бўлишни хоҳламасдик, ҳарҳолда.

Дилафрўз Толипова, Тошкент шаҳри.

– Хотиржам бўлишингиз мумкин, машқлар натижасида мушаклар аввалгидан кучлироқ бўлиши бор гап, лекин ҳеч қачон шишиб, бўртиб қолмайди. Йиллар давомида доимий шуғулланиш аёлнинг қоматини бузади, деган гап асоссиз. Чунки аёл организмида мушак ҳажмини ўстирувчи тестостерон гормони жуда ҳам кам бўлади. Спортчи қиз – аёллар эса деярли юз фоиз ҳолатда мушак ҳажмини махсус парҳез ва мураккаб машқлар ёрдамида ўстиришади. Сиз шуғулланаётган енгил машқлар ҳеч қачон мушак катталашишига олиб келмайди.

«Парҳез қилгач, машқ нега керак?»

—Мен парҳез ёрдамида бемалол озишим мумкин. Шундай экан, жисмоний машқлар нима учун керак, бизга?

Муҳаббат Йўлчиева, Қўқон шаҳри.

— Парҳез пайтида организм ёғлар билан бирга мушак массасини ҳам йўқотади. Натижада моддалар алмашинуви сустлашиб, яна қайтадан вазн йиғишга олиб келади. Кўп ҳолларда парҳезни тўхтатгач, аввалгидан ҳам семириб кетганлар фикримга мисол бўла олади. Яна бир муҳим жиҳат бор бор: қатъий парҳез пайтида организм керакли озуқа моддаларни қабул қила олмайди. Шунинг учун ҳам тўғри овқатланиш билан бир вақтда жисмоний машқларни бажариш зарур. Акс ҳолда саломатликка путур етиши мумкин.

Тажрибали мураббий сиз учун индивидуал тарзда машғулотлар ва тўғри овқатланиш рационини тузиб бериши керак. Унинг тавсияларига, айниқса, бошида икки ой қатъий амал қилсангиз натижаси сезилади.


Муборак АНВАРОВА тайёрлади

Google+
WhatsApp
VK
Telegram

Комментарии

МУТОЛАА