Андижон ўсмирлари ўртасидаги "самосуд" воқеасига ИИБ муносабат билдирди (видео)

ЖАМИЯТ 14.02.2020, 12:05
563
Андижон ўсмирлари ўртасидаги "самосуд" воқеасига ИИБ муносабат билдирди (видео)

Ижтимоий тармоқларда 12 февраль, чоршанба куни, қўлида пичоқ тутган ва ниқобдаги бир ўсмирнинг стулда қўли боғланган ҳолда ўтирган тенгдошига қўпол муносабатда бўлиб, уни ураётгани акс этган видео тарқалгани ҳақида хабар берган эдик

Эслатиб ўтамиз, видеода ниқобдаги ўсмир пичоқ билан тенгдошининг ҳаётига таҳдид солаётганини кўриш мумкин. Қўли боғланган ҳолда стулда ўтирган ўсмирнинг юзи ва кийими қонга белангани кўринади. Ўзбекистон Ички ишлар вазирлиги мазкур видеони ўрганди ва видео бўйича маълумот берди.

Қайд этилишича, видеодаги ўсмирларнинг суҳбатидан уларнинг Андижон вилоятидан эканлигини билиш мумкин. Ички ишлар идоралари томонидан олиб борилган ўрганиш ишлари натижасида видеодаги ёшларнинг шахси аниқланган. Видеодаги ҳолат эса мазкур ўсмирлар томонидан саҳналаштирилганлиги маълум бўлган.

Стулда қўли боғлиқ ҳолда ўтириб, жабрланувчи ролини ўйнаган, Шаҳрихон туманида яшовчи 10-синф ўқувчиси С.О.нинг маълум қилишича, видео унинг уйида ҳашар бўлаётган вақтда олинган. С.О. ўз дўстлари билан уйни таъмирлаш ишларини олиб бораётган вақтда, унинг кийимига қизил бўёқ томган ва қонга ўхшаб қолган. Шундан сўнг дўстлар мазкур видеони тасвирга олишга қарор қилган. Унинг айтишича, бу видео ортидан унинг ота-онаси бетоб бўлиб қолган.

Ўсмирларнинг иккинчиси — видеода қўлидаги пичоқ билан акс этган йигит, 2002 йилда туғилган 11-синф ўқувчиси К.Қ.нинг айтишича, улар мазкур видеони шунчаки ўзлари учун тасвирга олган, унинг ижтимоий тармоқларда тарқалиб кетиши ҳақида ўйламаган.

Мазкур ҳолатни тасвирга олган учинчи ўсмирнинг сўзларига кўра, видеодаги гаплар тўқима бўлган, улар шунчаки видеонинг қизиқ чиқиши учун айтилган.

Ҳозирда мазкур ҳолат бўйича Шаҳрихон тумани ИИБ томонидан ўрганиш ишлари олиб борилмоқда. Тўпланган ҳужжатлар қонуний қарор қабул қилиниши учун туман ҳокимлиги ҳузуридаги вояга етмаганлар ишлари бўйича идоралараро комиссияга юборилади.
 

Шарҳлар

Кун мавзуси: Фото
Об-ҳаво: Ташкент
+0° небольшой снегопад
Валюта курси