Наргиза Зокирова: “ Филипп мени ва ўғлимни ўлдириш билан таҳдид қилди”

11:26, 06 июнь

Наргиза Зокирова “Life.ru” нашрига берган интервьюсида эри, итальян хонандаси Филипп Бальзано томондан бўлаётган таҳдидлар ҳақида гапирди.

Наргиза Зокированинг никоҳни бекор қилиш жараёни катта оилавий жанжалга айланиб кетди. У ҳаёти жаҳаннамга айланганини билдирди. 

— Нима учун эрингиздан ажрашишга қарор қилдингиз?

— Бир йилдан бери эрим менга босим ўтказади. Барча муаммо менда нафрат уйғотувчи молиявий муаммоларга бориб тақаляпти. Нимагадир, у мени супуриб, миллионлаб пул топяпти деб ўйлайди, буни устига пешана терим билан топган пулларимни менга бериши керак деб ҳисоблайди. Эрим табиатан жанжалкаш бўлганлиги сабабли, Россияга ишлашга кетаётганимда, ундан бирор кор-ҳол бўлмаслиги учун уйда ўтиришни илтимос қилиб, болаларга қараб турса, пул билан таъминлашимни айтдим. Шу пайтгача топганимни Нью-Йоркка эрим ва болаларимга юбордим, аммо охирги пайтларда топган пулим унга камлик қиляпти. У менга катта миқдорда қарз бўлиб қолганлигини билдирди, бундай катта миқдордаги пулни топиш менга ҳам осон эмас. Бироқ унга ёрдам беришни бурчим деб билдим, чунки бу қарзни у “жиддий” одамларга тезда қайтаришим лозим деб тушунтирди.

— У кимдан қарз олган экан?

— Ҳозиргача эримнинг кимдан ва нима учун қарз олганини билмайман. Унинг шу пайтгача барча инжиқликларини кўтариб, машина олиб бердим, студия очишига ёрдам бердим, уйда таъмирлаш ишларини олиб бориш учун пул бердим. Бундан ташқари, болаларимнинг коллежда, мактабда ўқишлари учун барча пулларни ўзим тўлаганман. Энди бўлса, у мени болаларини ташлаб кетган “бемеҳр она” деб айбламоқда. У нафақат менга балки, оиламга, болаларимга ҳам таҳдид қилмоқда. Нью-Йоркка қайтганимнинг иккинчи куни Филипп уйга маст ҳолатда келиб, ўғлимга қўл кўтарди. Уларнинг орасига тушиб, зўрға ажратдим. Кучим етмагандан кейин полиция чақиришга мажбур бўлдим. Жанжалга онам ва болаларим ҳам гувоҳ бўлишди.

— Ажрашишингизга Филиппдан бўлган қизингиз Лейланинг муносабати қандай?

— Лейла 16 ёшга кирган бўлса-да, жуда ақлли қиз. Албатта у отаси билан ажрашаётганимдан жуда қайғураяпти. Бироқ отасининг баъзи бир ноўрин қилиқларидан хафа бўлиб, менинг тарафимни оляпти. У менга “Ойи, мен сизни жудаям севаман, отамнинг қилаётган ишларини кўриб турибман, ҳозирги вазиятда сиз акам Ауэль ва бувим билан қолинг, мен отамнинг олдида бўлишим, унинг бирор хатога йўл қўймаслиги учун ҳаракат қилишим лозим” деди. Ҳозирда у отаси билан бирга яшаяпти. Жанжал бўлган куни Филипп тўппончаси борлигини айтиб, мени ва ўғлимни “отиб ўлдираман” деб қўрқитди. Даҳшатга тушганимдан полиция чақиришга мажбур бўлдим.

— Бу турмуш қурганингиздан бери бўлган илк жанжалми? У илгари ҳам фарзандларингизга қўл кўтарганми?

— У фарзандларимни доим калтаклаган дея олмайман. Аммо болаларимга худди аскарларга мурожаат қилгандай муносабатда бўларди. Унинг бақиришидан деворлар зириллар, баъзан буни эшитгандан калтак еган маъқул деб ҳисоблардим. Бунга мен ҳам, ўғлим ҳам чидардик. У ўғлимни тўрт ёшидан бошлаб, тарбиялаб келмоқда. Филипп ўғлимни илгаридан ёқтирмас эди. Жанжал вақтида ўғлимнинг томоғидан бўғганини кўриб, орамида ҳамма нарса тугаганлигини ҳис қилдим. 

— Никоҳни бекор қилиш жараёни бошландими?

— Ҳа, ҳозир бу масала билан Нью-Йорк адвокатлари шуғулланмоқда, бирор ҳужжат керак бўлса Россиядан юбораман. Мен уни чин дилимдан севардим, барча ёмон фазилатларига кўз юмиб келгандим. Унинг хулқ-атворини яхши билган танишларим ажраш, у билан узоққа бормайсан, деганда қулоқ солмагандим. Мен муҳаббатимга, ҳаммаси изга тушишига ишонгандим. Афсус... ҳаммаси ўйлаганимдан бошқача бўлди...

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!