Евро–2016 турнирининг энг бой футболчилари. ТОП-5

15:11, 16 июнь

Футбол бўйича 2016 йилги Европа чемпионати айни қизғин паллага кириб бормоқда. Гуруҳ босқичининг 1-тур учрашувлари якунига етиб, 2-тур ўйинлари старт олди. 

Мазкур турнирда қатнашаётган футболчилардан қайси бири энг кўп  даромад олишини ҳеч ўйлаб кўрганмисиз? Агар йўқ бўлса қуйидаги мақола сиз учун манзур бўлади. 

1. Криштиану Роналду (Португалия)

Маош ва турли бонуслар: $56 млн

Рекламадан даромад: $32 млн

ЖАМИ: $88 млн

Дунёга машҳур Forbes журналининг ҳисоб-китобига кўра, Криштиану Роналду 2016 йилда нафақат футболда, балки бутун спорт оламида энг кўп даромад топган спортчи бўлди. Унинг “Реал” билан 2018 йилга қадар мўлжалланган келишувига кўра, у йилига турли бонуслар билан 56 млн доллар ишлайди. Рекламадаги даромади эса 32 млн долларни ташкил этади. 

Дунёнинг энг сердаромад футболчиси бўлган Роналдунинг Европа чемпионатида ҳозирча омади келмаяпти. Дастлабки турда турнир дебютанти Исландия билан ўйнаган Поргугалия 1:1 ҳисобида дуранг ўйнади. Роналду эса гол ура олмади. Шунга қарамай, у бизнинг рейтингимизда 1-поғонани забт этди. 

2. Златан Ибрагимович (Швеция)

Маош ва турли бонуслар: $30,4 млн

Рекламадан даромад: $7 млн

ЖАМИ: $37,4 млн

Швециялик 34 ёшли “қария” ҳамон кучга тўла ва терма жамоасини марралар сари етаклашига ишонади. Роналду сингари унинг ҳам Евро–2016да “оти чопмаяпти”. Илк ўйинда Швеция Ирландия билан дуранг (1:1) ўйнаб қўйди. Аммо айнан Златаннинг хатти-ҳаракатлари эвазига Швеция мағлубиятдан сақланиб қолди.

Ибрагимович йилига 37,4 млн доллар маош торади. Уларнинг аксарияти ($30,4 млн)ПСЖ билан тузилган шартномадан келган. Қолган 7 млн реклама тушумларини ташкил қилади. Қайд этиш керакки, футболчи ёзда Париж клубини тарк этди ва катта эҳтимол билан “Манчестер Юнайтед”га ўтади. 

3. Гарет Бэйл (Уэльс)

Маош ва турли бонуслар: $24,9 млн

Рекламадан даромад: $11 млн

ЖАМИ: $35,9 млн

Юқоридаги икки қаҳрамонимиздан фарқли равишда Гарет Бэйл мамлакат терма жамоаси сафида анча ишонли ўйин намойиш қилмоқда. У дастлабки ўйинда жарима зарбасидан гол киритиб, Словакия устидан эришилган 2:1 ҳисобидаги натижага ўз ҳиссасини қўшди. 

“Реал” ҳужумчиси дунёнинг энг қиммат футболчиси сифатида қайд этилган бўлса-да, шахсий даромади бўйича Роналду ва Залатандан қолиб кетади. Forbesжурналининг таҳлилига кўра, Бэйлнинг йиллик даромади 35,9 млн доллардан иборат. 

4. Уэйн Руни (Англия)

Маош ва турли бонуслар: $20,1 млн

Рекламадан даромад: $6 млн

ЖАМИ: $26,1 млн

Англия терма жамоаси сардори Уэйн Руни Европа чемпионатининг энг сердаромад футболчилари орасида 4-ўринни эгаллади. 30 ёшли футболчи йилига 26,1 млн доллар маош олади. Шулардан 20,1 млн долларини “Манчестер Юнайтед” тўлайди. Қолган 6 млн доллар турли рекламалардан келади. 

Руни Евро–2016 турнирини омадли бошлади дея олмаймиз. Унинг сардорлиги остида Англия илк ўйинда Россия билан дуранг ўйнади. Футбол ишқибозлари эса Англиядан яхшироқ натижа кутганди. 

5. Бастиан Швайнштайгер (Германия)

Маош ва турли бонуслар: $19,4 млн

Рекламадан даромад: $3 млн

ЖАМИ: $22,4 млн

Германия терма жамоаси фахрийларидан бири Бастиан Швайнштайгернинг йиллик даромади 22,4 млн долларни ташкил қилар экан. Фаолиятининг асосий қисмини “Бавария”да ўтказган Швайни ўтган йили “МЮ”га келиб қўшилди. У ерда ҳам унга яхшигина маблағ тўлашмоқда. 

Германиялик ярим ҳимоячи клуб билан шартномасидан йилига 19,4 млн доллар олса, 3 млн долларни рекламадан топади.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!