Актриса Лия Ахеджакова 78 ёшда. Актрисанинг ҳаёт ва ижод йўли

12:40, 08 июль

Бу актриса бошқа актрисалардан ўзининг трагикомик роллари билан ажралиб туради. “Lady.mail.ru”  нашри сизни Лия Ахеджакованинг ҳаёти ва ижоди билан таништиради.

Болалиги
Лия Межидовна Ахеджакова 1938 йилнинг 9 июлида Днепропетровск шаҳрида дунёга келган. Унинг онаси Юлия Александровна етакчи актрисалардан бири бўлган бўлса, отаси  Межид Солиҳович — Адигей республикасининг Майкоп шаҳридаги А.С.Пушкин номли Рус давлат драматик театри бош режиссёри вазифасида ишлаган.

Театр спектакллар қўйиш учун қишлоқларга чиқар, томошалар иситилмайдиган, совуқ клубларда қўйилгани боис, онасининг ўпкаси шамоллаб, сил касаллигига чалинади. Шунда кичкина Лия мамлакат раҳбари Сталинга ўша пайтда энди ихтиро қилинган камёб доридан онасига юборишни сўраб, илтимоснома ёзади ва “халқ доҳийси”га мактабни олтин медаль билан тугатишга ваъда беради. Қизчанинг мактубидан кейин Риганинг дори ишлаб чиқарувчи заводидан уларнинг оиласига дори-дармон юборилади. Бу дорилар нафақат  онасига, балки шу касалликка чалинган отаси ва холасига ҳам етади. Лия ваъдасига вафо қилиб, мактабни олтин медаль билан битиради. 

Илк карьераси
У мактабни битиргандан кейин журналист бўлиш орзусида Москвага отланади, аммо омади чопмайди. Суҳбат чоғида берилган саволларга яхши жавоб беролмайди.  Кейин Москва олтин ва рангли металллар институтига ҳужжат топшириб, талабалар сафига қабул қилинади. Ўқиш давомида  институт бадиий ҳаваскорлик тўгарагининг фаол аъзосига айланади. Ўқишдан кўра, тўгаракка қатнашиш уни кўпроқ қизиқтиради. Бир ярим йил ўқигандан кейин Лия ўқишни ташлаб, ватанига қайтиб кетади. Келаси йили яна Москвага қайтиб, А.В.Луначарский номли давлат театр санъати институти (ГИТИС) га ўқишга киради ва институтнинг етакчи, фаол талабаларидан бирига айланади.

Театр саҳнаси
Лия Ахеджакованинг актёрлик таржимаи ҳоли талабалик пайтларидаёқ ёш томошабинлар театридан бошланади. У қуёнча, безори бола каби турли ролларни маҳорат билан ижро этади. Аммо тетар танқидчилари уни  “Акам кларнет чалади” водевилидаги Женька ролидан кейин тан олади. Лия Ахеджакова 1977 йилда “Современник” театрига ишга ўтади ва илк пайтларда фақат эпизодик ролларда намоён бўлади.

Роман Витюкнинг “Коломбинлар хонадони” спектаклидаги бош роли унга ҳақиқий муваффақиятни олиб келади ва бирваракайига тўртта спектаклда бош қаҳрамон ролини ўйнайди. Евгений Гинзбург асари асосида Галина Волчек саҳналаштирган “Қатъий йўналиш” спектаклидаги  Сталин террори қурбони бўлган Татаристон раҳбарларидан бирининг рафиқаси бўлган Зина-татар роли ҳам шулар жумласидандир.

Кинодаги фаолияти
Унинг режиссёр Элдор Рязанов билан бўлган ҳамкорлиги “Тақдир ҳазили ёки қушдай енгил бўлинг” фильми орқали бошланган эди. Элдор Рязанов уни навбатдаги “Ишдаги ишқ” фильмидаги котиба Верочка ролига таклиф этади. Унинг бу роли томошабинлар қалбидан чуқур ўрин олиб, гаплари машҳур ибораларга айланади. Шундан кейин у бир неча фильмларда суратга тушади ва “Ника” мукофотини қўлга киритади.

Шахсий ҳаёти
Актриса уч бора турмушга чиққан. Илк маротаба ўзи билан ёш томошабинлар театрида ишловчи актёр Валерий Носикка турмушга чиқади. Аммо ичкиликка муккасидан кетган турмуш ўртоғининг суратга олиш жараёнида бошқа аёл билан хиёнат қилгани боис отаси олиб берган икки хонали квартирани эрига ташлаб, уйдан чиқиб кетади.

Рассом Борисом Хочейшвили билан қурган турмуши ҳам узоққа бормайди. Лия Межидовна рассомни тан олишлари учун қўлидан келган ёрдамини аямайди. Унинг саъй-ҳаракатлари туфайли рассомнинг чизган суратлари Голландия ва Францияда ўтказилган кўргазмаларга қўйилади. Борис Хочейшвили машҳурликка эришгач, уларнинг муносабатларига путур етади.

Актриса учинчи маротаба 63 ёшида фотомухбир Владимир Персияниновга турмушга чиқади. Ҳозирда Владимир Персиянинов фотокўргазмалар билан машғул, бундан ташқари рафиқасининг агенти, менежери ва яқин ёрдамчиси вазифаларини ҳам бажаради. Актрисанинг фарзанди йўқ.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!