Ор-номус қурбонига айланган аёллар тақдиридан сўзловчи суратлар

11:32, 26 июль

Покистон парламенти ор-номус учун қотилликка қўл ураётган фуқароларни жазолаш юзасидан шошилинч равишда янги қонун лойиҳаси устида иш олиб бормоқда, деб хабар берди “Lenta.ru” нашри.  

Бунга мамлакатнинг машҳур фотомоделларидан бирининг ижтимоий тармоққа сурат жойлагани учун акаси томондан бўғиб ўлдирилганлиги сабаб бўлди. Ҳар йили ислом мамлакатларида минглаб аёллар турмуш ўртоғи, ота-онаси ва бошқа қариндошлари томонидан бошқаларнинг жимгина кузатуви остида турли жисмоний қийноқларга солинади.

Acid Survivors Trust International жамғармасининг берган маълумотларига кўра, дунё бўйича, ҳар йили аёлларга нисбатан кислота сепиш орқали 1500 ҳужум уюштирилиб, бунинг оқибатида улар сочидан, кўз нуридан, эшитиш қобилиятидан, гўзаллигидан жудо бўладилар. Шундай ҳодисаларнинг 250-300 таси айнан Покистон мамлакатида рўй беради. Покистонлик аёлларга нафақат оила аъзолари, танишлари, қариндошлари, балки етти ёт бегона одамлар ҳам ҳужум қилаверади. Аёлнинг жазоланишига биргина нигоҳи, қайсидир қилиғи эркакка ёқмаганлиги, болаларини сотишдан бош тортиши ёки ёқтирмаган одамига турмушга чиқишга қаршилик қилгани сабаб бўлиши мумкин.

Аёлга нафақат кислота сепилади, балки тириклай ёқиб юборилиши, бурни, лаби, қулоғи кесилиши каби чоралар ҳам қўлланилиши мумкин, бундай жисмоний қийноқларга солинган аёлларнинг аксарият қисми ҳалок бўлади. Тирик қолганлари эса ижтимоий ҳаётдан узоқлашиб, ёлғизликда кун кечиришга мажбур бўлади. Баъзилари эса депрессияга тушиб, ўз жонига қасд қилади. 

2010 йилда Миллий ассамблея томондан кислота сотилишини чегаралаш, уни сепган одамни жазолаш ҳақида қонун қабул қилинганига қарамай, бундай жиноятларни амалга оширган одамлар жазоланмай келмоқда. Суд ва эскилик тарафдори бўлган жамоатчилик аёлларни қийноққа солаётган эркакларни ҳимоя қилиб, шариат қонун-қоидаларини ёқламоқдалар. Полиция ҳам “оилавий ишлар”га аралишишни истамайди.

Яқин Шарқ мамлакатлари фуқаролари Ғарбга кўчиб кетган тақдирида ҳам, ўзлари билан бирга оиласидаги аёлларга зўравонлик қилиш анъаналарини олиб кетмоқдалар. Масалан, Буюк Британия ҳуқуқ-тартибот идораси берган маълумотга кўра, 2010 дан 2014 йилга қадар Қўшма қиролликда ор-номусни ҳимоя қилиш учун аёлларга зўравонлик ишлатиш бўйича 11 744 та жиноят содир этилган. 

Покистоннинг Лаҳор шаҳридан бўлган Саира Лиакат ҳозир 29 ёшда, суратга тушган вақтда 22 ёшда бўлган. 2003 йилда оилавий жанжал туфайли кислота сепилган.
Тўй арафасида куёвнинг опаси келин томон тўй учун кўп нарса сўради деб, жанжал кўтарган ва укасини Саирага уйланмасликка ундаган. Оқибатда 18 ёшли қиз икки ўт орасида қолган … 

Ирам Саид ўзи ёқтирмаган инсонга турмушга чиқишни истамагандан кейин рад этилган куёв томонидан юзига кислота сепилган. Қасоскор “куёв”нинг қилган ишидан кейин қиз кўзларидан айрилган. “Бу азобларни бошимдан ўтқазишим жуда қийин бўлди, аммо яшашга қарор қилдим. Жиноятчига ҳар қанча жазо берилмасин, у менинг соғлигимни, гўзаллигимни қайтара олмайди”, дейди қиз. 

Суратдаги камбожалик Сокрен Мин 36 ёшда. Қўлида эса, кислота сепилишидан сал олдин, 18 ёшида тушган суратини тутиб турибди. Кислотани турмуш ўртоғининг собиқ рафиқаси сепган. (Сокрен турмуш ўртоғидан ажрашган). Қиз гўзаллигини қайтариш учун эмас, балки тирик қолиш учун 20 марта жарроҳлик столига ётган. Бунда Минга Cambodian Acid Survivors Charity нафақат тиббий муолажаларда , балки бошпана топишда ҳам яқиндан ёрдам берди.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!