Йигитали Мамажоновдан кўпчиликни қизиқтирган саволларга қисқа ва лўнда жавоблар

11:38, 22 сентябрь

“Қисқа ва лўнда” лойиҳасининг бу галги қаҳрамони фильм ва клиплардаги роллари билан эътиборга тушган, кўпчиликнинг севимли актёри Йигитали Мамажонов...

МАВСУМ ЯНГИЛИГИ
Айни кунларда янги фильмнинг суратга олиш ишлари  билан бандмиз. Ёш режиссёр Малика Тешабоеванинг "Бегуноҳ" картинасида бош ролларнинг  бирини ижро этяпман. Бундан ташқари Куваниш Реймбаев суратга олаётган “Коктейль”фильмида ҳам ҳамкорлик қиляпмиз.  

ТУШКУНЛИККА ТУШСАМ...
Мен аввало  тушкунликка тушмасликка ҳаракат қиламан. Чунки ҳар бир кунимиз ғанимат. Уни хафагарчиликда, ёмон кайфиятда ўтказмаслигимиз керак. Лекин ҳар хил вазият бўлади. Агар кайфиятимни туширадиган вазият бўлиб қолса, онажоним билан гаплашишга ҳаракат қиламан. Оналарнинг дуосида гап кўп. 

СПОРТ
Спорт билан мунтазам шуғулланишимни кўпчилик яхши билади. Аммо буни ҳадеб такрорлайверсам, ўқиган одамга эриш туйилиши, худди мақтанаётгандек бўлиб кўринишим мумкин. Инсон спорт билан, атрофдагилар учун эмас, ўз соғлиғини ўйлаб шуғулланади. 

МЎЪЖИЗА
Бу борада жуда кўп гапирса бўлади. Қисқача айтсам, инсон яралишининг ўзи  бир мўъжиза-ку. 

МИШ-МИШЛАР...
Очиғи, гап-сўзларга жиддий қарамайман. Одамлар ё бекорчиликдан, билиб-билмай, ёки  атайлаб миш-миш гапларни тарқатиши мумкин. Шундай экан, бундай гапларга эътибор бермасликка ҳаракат қиламан, бошқаларга ҳам шуни маслаҳат бераман. Мен ҳақимда доим турли гап-сўзлар юради. Уларни изоҳлаб, ўзимни оқлашим шарт эмас. Мени яхши таниганлар қандайлигимни билишади. 

ЁЛҒОН.
Ўзим ёлғон гапирмайман. Шунинг учун ҳам алдайдиганларни ёқтирмайман. Агар суҳбатдошим менга ёлғон гапираётган бўлса, уни тезда англаб оламан. Буни кўзларидан билиб оламан. Аммо ўша одам билан ҳеч қачон урушиб, жанжаллашмйаман. Ўзим учун хулоса қиламан, бўлди.

ХАФА ҚИЛСАМ...
Агар кимнидир билиб-билмай ранжитиб қўйсам, ўша заҳоти кечирим сўрайман. Акс ҳолда, “кўнглини оғритиб қўйдим” деб сиқилиб юраман. Агар менда айб бўлмаса, вазиятга қарайман. Агар мендан ёши катта инсон бўлса, ҳар қандай ҳолатда узр сўрашдан уялмайман. Кечиримли бўлиш инсоннинг энг яхши фазилатларидан биридир. 

ЁҚТИРМАГАН САВОЛ
Шахсий ҳаётимга тегишли бўлган саволларни ёқтирмайман. Айниқса, бегона ва ҳаётимга алоқаси бўлмаган инсон шундай савол берса, жаҳлим чиқиши аниқ. Чунки ҳаётим, оилам ва ўзимни бировлар билан муҳокама қилишни ёмон кўраман. 

КУМИР
 Кумирларим жуда кўп. Актёрлардан, Аль Пачино, Роберт Де Ниро, Том Хенкс, Рассел Кроу, Леонардо Ди Каприо, Уиил Смит ва яна кўпларнинг ижодини кузатиб, ўрганаман. Хонандалардан эса Майкл Жексон, Адель, Андреа Бачелли, Бетховен, Бах, Шестокович, Чайковский  ва бошка классик ва эстрада ижодкорларини қўшиқларини мазза қилиб тинглайман. 

САЁҲАТ
Кўпгина жойларга саёҳатга боришни истайман. Асосийси, йўл олган жойим тинч бўлиши шарт. Кейин тарихи, манзараси, иқлими ҳам менга тўғри келишига қараб, саёҳатга чиқаман. 

ОИЛА
Оила мавзусида жуда кўп саволлар беришади. Уларга жавоб беришни ёқтирмаслигимни айтим, лекин шундай бўлса-да, “Даракчи” учун қисқача тўхталиб ўтаман: яна бир бор оила қуришим аниқ. Фақат қачонлигини ўзим ҳам билмайман. Бир кун албатта, оқила, одобли, озода, итоаткор қиз учрашига ишонаман. 

Алия СУЛАЙМАНОВА

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!