Бахтли оилалардаги биз кўрмайдиган 10 та жиҳат

11:11, 23 сентябрь

“Бахтли оилаларнинг барчаси бир-бирига ўхшайди”, — деб ёзганди Лев Толстой “Анна Каренина” романида. Ёзувчи ҳақмиди? Наҳот барча бахтли оилаларда қандайдир умумий хислат бўлса? “Deti.mail.ru” психологлар фикрича, бахтиёр оилаларни бирлаштирувчи 10 та одатни санаб ўтди.

 

1. Улар бир-бири ҳақида қариндош ва дўстларига шикоят қилмайди

Бахтиёр эр-хотин ўз муносабатларига учинчи шахсларни жалб қилиш керак эмаслигини билади.Агар тушунмовчилик юзага келса, улар бир-бири билан очиқчасига гаплашиб олади. Аёлнинг дугоналари ва эркакнинг дўcтлари бетарафликни сақлай олмайди ва муносабатларингизга фақат путур етказиши мумкин, холос.

 

2. Улар бир-бирини бошқалар билан солиштирмайди

Бахтиёр эр-хотин бир-бирини борича, барча камчиликлари билан қабул қилади ва севади. Улар бир-бирининг камчиликлари устидан кулмайди, қарашлар ва фикрлардаги тафовутни қабул қилади ҳамда бир-бирига ўсишда ёрдам беради.

 

3. Улар ўзини қурбон қилиб кўрсатмайди

Бахтли жуфтликлар бир-бирини ўз муаммоларида айбламайди, аксинча ҳодиса учун жавобгарлик иккаласининг ҳам бўйнида эканлигини англайди.

 

4. Улар доим ҳам жиддий эмас

Бахтли оилалар хурсандчилик қилишни, кулишни, ҳазиллашишни, ва шу тариқа ўз муносабатларини янгилашни билади. Ҳаёт уларга қарши чиққанда ҳам улар муаммо устидан кулиш имкониятини топади.

 

5. Улар бир-бирини танқид қилмайди ва “эговламайди”

Бахтиёр жуфтликлар бир-бирининг яхши хислатларини кўришга ҳаракат қилади, муаммолар юзага келганда эса нима содир бўлаётганини англашга уринади. Агар жуфтингиз кўнглингизга хуш келмайдиган нарсани қилаётган бўлса, унга бу ҳақда айтишнинг мақбул йўлини топинг. Танқид ва кўз ёши ёрдамида истаган нарсангизга эриша олмайсиз — бунда киши сизни тингламай қўяди ва сизнинг у ҳақдаги паст фикрингизни тасдиқлаш учун қасдма-қасдига иш тутади.

 

6. Улар фикрларни ўқишга уринмайди

Бахтли эр-хотин бир-бирига ўз эҳтиёжлари ҳақида қандай маълум қилишни билади. Биз энди катта одамлармиз ва бизда яширинча хафа бўлиш ўрнига, бизга керак нарсани сўрашнинг турли усуллари бор. Агар сизга эътибор етишмаётган бўлса, бу ҳақда билдиринг. Очиқчасига билдириш — баркамол ва мустаҳкам алоқаларнинг асоси.

 

7. Улар фақат ўз ролларига “ёпишиб қолмаган”

Бахтли жуфтликлар гендер роллари масаласига жуда қатъий тарзда ёндашмайди. Улар ўзгарувчан ва кўп вазифали бўла олади: бугун сиз овқат пиширасиз, эртага — мен, бугун болага мен қарайман, эртага — сиз ва ҳоказо.

 

8. Улар бир-бирига бақирмайди

Ҳадеб бақиришга ўтиб кетаверадиган киши беқарор ва ўзига ишонмаган одамдир. Эр-хотин муносабатларида баланд оҳангдаги суҳбатларга йўл қўйиб бўлмайди, чунки вақт ўтиши билан улар бир-бирини эшитмай қўяди.

 

9. Улар ҳар ишда бир-бирини назорат қилавермайди

Рашк қилиш, назорат қилиш, ҳукмдорлик қилишга уриниш — ўзига бўлган ишончи етарли бўлмаган ҳолларда кузатилади. Умр йўлдошингизга ўз “ҳудуд”ига эга бўлишига қўйиб беринг, шунда у сизга кўпроқ интилади.

 

10. Улар бир-биридан мукаммалликни кутмайди

Умр йўлдошингиз “оқ отдаги шаҳзода” бўлишини кутасиз, аммо реал одам ва унинг камчиликлари билан дуч келгач, ҳафсалангиз пир бўлади, зардангиз қайнайди. Ўзингиз ва бошқаларни ўз ҳолича қабул қилиш вақти келди. Жуфтингиздан яхши томонларни изланг, уни ютуқлари учун мақтанг.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!