Муддати ўтган косметикадан эҳтиёт бўлинг!

14:44, 27 октябрь

Қўлланмани пардоз столингиз ёнига илиб қўйинг!

Статистик маълумотларга кўра, ҳар куни пардоз воситаларидан фойдаланадиган аёл организмига бир йилда 2 кг. кимёвий модда тушар экан. «Нақадар даҳшат!» дея ваҳимага тушишга шошилманг. Косметик восита ишлаб чиқарувчилар маҳсулотларининг инсон организми учун зарар етказмаслигига жавобгардирлар. Лекин пардоз воситаларининг муддати ўтган бўлса-чи? Унда уларнинг таркиби учун ҳам, соғлигингиз учун ҳам ўзингизда бошқа ҳеч ким масъул бўла олмайди. Демак, муддати ўтган пардоз воситаларидан кутиладиган талофотлар билан таништирамиз.

Тушь

Сақлаш муддати: 3 ойдан 6 ойгача. Пардоз воситалари орасида «умр»и энг қисқаси шу.

Муддат ўтгач: қуриб қолгани учун қўллашга ярамайди. Аммо аёллар кўпинча қуриган тушь флаконига турли суюқликлар қуйиб, уни суюлтирмоқчи бўлашади. Натижада тушнинг кимёвий таркиби ўзгариб кетади. Бу эса кўзнинг шоҳпардаси яллиғланишига олиб келади.

Кўз учун суюқ қалам

Сақлаш муддати: 3 ойдан 6 ойгача. Бу ҳам худди тушь каби тез қуриб қолади.

Муддат ўтгач: унда бактериялар кўпая бошлайди, кўзга суртилгач, зарарли микроорганизмлар кўз шиллиқ пардасига тушади ва унинг яллиғланишига олиб келади.

Тенлар

Сақлаш муддати: 1 йил.

Муддати ўтгач: қовоқ терисида аллергик реакция келтириб чиқаради, кўзлар қизариб, шишиб кетади.

Кўз, қош ва лаб учун қалам

Сақлаш муддати: 2 йил.

Муддат ўтгач: қаттиқлашиб қолади, яхши суртилмайди. Кўз учун қалам кўзга механик зарар етказади – кўз милкини тирнайди. Тирналган жойларга бактерия тушиб, касаллик келтириб чиқаради.

Лаббўёқ  

Сақлаш муддати: 1,5 йил.

Муддат ўтгач: нохуш ҳид чиқара бошлайди, ўзида бактерияларни йиғади. Улар лаб териси ва оғиз орқали организмга, биринчи навбатда, ошқозонга тушади. Ички касалликларни келтириб чиқаради.

Лаб учун бальзам

Сақлаш муддати: 2 йил.

Муддати ўтгач: фойдалилик хусусиятини йўқотади, таркибидаги намлик миқдори камаяди ва лабларни қуритади.

Ёғупа

Сақлаш муддати: 1 йилдан 1,5 йилгача. Муддат ўтгач: увадаланиб, сочила бошлайди. Юзга суртилганда, думалоқ-думалоқ бўлиб ушоқланади. Тери аллергиясини келтириб чиқаради, қичишиш, қизариш, шишлар юзага келади.

Кремлар  

Сақлаш муддати: 6 ой.

Муддат ўтгач: таркибидаги сув юзага чиқади, асос эса тубига чўкади, замбуруғлар, бактериялар кўпаяди. Юзга ҳуснбузарлар, турли тошмалар тоширади. Бундан ҳам ёмони, касаллик келтириб чиқарувчи микроблар тери орқали қон томирларига тушиб, жиддий оқибатларга олиб келиши мумкин.

Упа   

Сақлаш муддати: 1 йилгача.

Муддат ўтгач: кукун шаклидагиси таркибида чанг, майда бургалар, қаттиқ пудра ва спончда эса бактериялар кўпаяди. Улар экзема келтириб чиқаради.

Қуёшдан ҳимояловчи крем

Сақлаш муддати: 6 ой.

Муддат ўтгач: ўз вазифасини бажармай қўяди, яъни терингизни қуёшдан ҳимоя қилмайди. Натижада, қуёшда куйиш, тери кўчиши каби нохуш ҳолатлар юзага келади.

Соч учун мусс, лак, гель-воск

Сақлаш муддати: 6–12 ой.

Муддат ўтгач: таркибидаги кимёвий моддалар хусусиятини ўзгартиради. Натижада сочларни тўкади, қуритади, қазғоқ пайдо қилади.

Тирноқ учун лак

Сақлаш муддати: узоғи 6 ой.

Муддат ўтгач: қурийди, жилосини йўқотади. Тирноқларга яхши суртилмайди, тез кўчиб кетади. Шунингдек, тирноқларни емиради, синувчан қилиб қўяди.

Атир

Сақлаш муддати: 2 йилгача.

Муддат ўтгач: ифори сусаяди, ифорнинг танада сақланиш муддати ҳам камаяди. Айримларнинг терисида аллергия беради.

Юз терисини тозаловчи воситалар

Сақлаш муддати: 1 йил.

Муддати ўтгач: ҳидининг ўзгариши ва ранги хиралашади. Натижада тозаловчи эмас, зарарлантирувчи воситага айланади.

Шампунь

Сақлаш муддати: 2 йил.

Муддат ўтгач: ифори ва фойдалилик хусусиятини йўқотади. Бош терисини қичиштиради, қазғоқлар келтириб чиқаради.

Душ учун гель

Сақлаш муддати: 2 йил.

Муддат ўтгач: қурий бошлайди, таркибидаги ифор берувчилар ўз кучини йўқотади, кимёвий таркиби ўзгаради, натижада, терида турли тошмаларни келтириб чиқаради.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!