Огоҳлик ҳар доим, ҳар ерда керак

19:12, 04 ноябрь

Тошкент вилоятидаги ҳарбий қисмларидан бирида “Оилани сақлашда аёл ва эркакнинг тутган ўрни” мавзусидаги тадбир бўлиб ўтди. Унда тегишли идора ва ташкилотлар, оммавий ахборот воситалари вакиллари, ҳарбийларнинг оила аъзолари иштирок этди.

Тадбирда сўз чиққан подполковник З.Рўзиев, Тошкент шаҳридаги “Тўра бува” жоме масжиди имом-хатиби З.Айсқов, Ўзбекистон хотин-қизлар қўмитаси бош мутахассиси И.Каримова, “Саодат” журнали бош муҳаррири Ф.Жалилова ва бошқалар тинчлик ва осойишталикни сақлашда ҳарбий хизматчиларнинг ўрни, юртимизда аёлларнинг жамиятдаги мавқеини ошириш борасида амалга оширилаётган ишлар, аҳолини, айниқса, ёшларимизни турли зарарли оқимлар таъсиридан ҳимоялаш сингари масалаларга тўхталиб ўтдилар.

Таъкидланганидек, бугунги кунда огоҳлик, ҳушёрлик, Ер юзида мафкуравий қарама-қаршиликлар авж олаётган айни дамда ҳар қачонгидан ҳам долзарб аҳамият касб этаётир. Турли ёвуз кучлар, динни ўз чиркин  мақсадлари йўлида ниқоб қилиб олган кимсалар ёшларни ўзларига оғдириш учун турли усуларни қўллаётгани, айрим ҳолларда бунга муваффақ бўлаётгани ачинарлидир. Бундай ҳолатларнинг олдини олиш учун эса, ҳар биримиздан сергаклик, диққат ва эътибор талаб қилинади.

Шунингдек ҳарбийлик нақадар масъулиятли ва шарафли касб эканлиги, бу соҳа вакиллари Ватан олдидаги бурчини шараф билан адо этишлари учун уларнинг оила аъзолари ҳам ёрдам беришлари лозимлиги қайд этилди, оилаларнинг мустаҳкамлигини таъминлашда аёлларимизнинг олдида турган улкан вазифалар  санаб ўтилди.

Тадбир иштирокчилари ўзларини қизиқтирган барча саволларга жавоб олдилар.

                                      ***

Пойтахтимиздаги ҳарбий қисмлардан бирида ўтган тадбирлардан яна бири “Тинчлик – энг олий неъмат, уни асраш барчамизнинг бурчимиз” шиори остида ўтди. Унда бир қатор идора ва ташкилотларнинг масъул ходимлари, ҳарбий хизматчилар, оммавий ахборот воситалари вакиллари иштирок этди. Тадбирда “Ватан муқаддасдир” номли фильм томошабинлар ҳукмига ҳавола этилди.

Тадбирда сўзга чиққан полковник И.Ибрагимов, подполковник У.Бўтаев, Ўзбекистон Мусулмонлари идораси масъул ходими И.Маърупов ва бошқалар тинчликнинг ғоят улуғ неъмат эканлиги, уни сақлаш ҳар биримиздан катта масъулият талаб этишини айтиб ўтдилар.

Дарҳақиқат, юртимизда тинчлик, осойишталик ҳукм сураётган бир пайтда дунёнин турли нуқталарида қирғинбарот жанглар давом этаётир. Энг даҳшатлиси бу қатлу қирғинлар азалдан инсонпарварлик, эзгулик дини ҳисобланган Ислом номидан содир этилмоқда. Бу кимсалар ўзларининг кирдикорларини “жиҳод”, “ҳижрат”, “шаҳидлик” сингари атамалар билан ниқоблашга уринмоқдалар.

Хусусан, бир гуруҳ ақидапараст террорчилар  босқинчилик ва зўравонлик  йўли билан эгаллаб олинган  ҳудудни “ислом давлати” деб атаб, у ерда мисли кўрилмаган ваҳшийликларни амалга оширишмоқда. Қанчадан-қанча бегуноҳ инсонлар куракда турмайдиган айбловлар билан ваҳшиёна қийноқларга дучор этилмоқда, ғаддорларча қатл қилинмоқда. Улар томонидан минг-минг йиллик тарихий обидалар, осори атиқалар ер билан яксон этилмоқда. Минг афсуски, улар сафида бизнинг ватандошларимиз, миллатдошларимиз ҳам учраб турибди.

Бундай нохуш ҳолларнинг олдини олиш учун эса, ҳар бир оилада, маҳаллаларда, таълим-тарбия муассасаларида ёшларимизнинг  таълим-тарбиясига жиддий эътибор қаратиш, улар онгида маънавий бўшлик пайдо бўлишига йўл қўймаслик, уларга соф исломий қадриятлар ва ақидапарастлик ғоялари ўртасидаги тафовутларни тушунтириб беришни вазиятнинг ўзи тақозо этмоқда.

Тадбир иштирокчиларига бу борада амалга ошириш лозим бўлган ишлар хусусида кенг тушунчалар берилди.

 

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!