"Локомотив" ўз тарихида илк бор Ўзбекистон чемпионига айланди

11:47, 20 ноябрь

Тошкентнинг "Локомотив" жамоаси Ўзбекистон Профессионал Футбол Лигасининг 2016 йилги мавсуми чемпионига айланди. Бу ҳақда ЎФФ матбуот хизмати расман маълум қилди. 

Олий Лига 29-тур ўйинлари доирасида 17 ноябрь куни чемпионат турнир жадвалининг иккинчи поғонасидан ўрин эгаллаб турган "Бунёдкор" ўз майдонида "Навбаҳор"ни қабул қилиб, 1:1 ҳисобида дуранг ўйнаб, 1 очкони қўлга киритди ва турнир пешқадами - "Локомотив" билан очколар сонини тенглаштириш учун имконияти қолмади.

"Темирйлчилар" 18 ноябрь куни 29-тур доирасида ўз майдонида бўлган Бекободнинг "Металлург" жамоасига қарши ўйинга чемпион сифатида тушди ва йирик - 4:1 ҳисоби билан ғалаба қозонди.

Ўйин якунлангач, "Локомотив"га чемпионлик кубогини топшириш маросими ўтказилди. 
Шу тариқа 2002 йилда ташкил этилган Тошкентнинг "Локомотив" жамоаси ўз тарихида илк бора Ўзбекистон чемпионига айланди.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!