Машҳурларнинг энг антиқа иримлари

15:59, 24 ноябрь

Иримларга ишонасизми? Йўлидан қора мушук кесиб ўтса, изига қайтадиган ёки “тумор омад келтиради” дейдиганлар сирасиданмисиз? «Ҳа» деб жавоб берсангиз ҳам, аслида ич-ичингизда бу иримлар бўлмаган гап эканига ишонасиз. Бироқ ошкора тан олишга келганида ожизлик қилиб қўясиз, нимадир халал беради. Буни қарангки, дунё юлдузлари ҳам жуда антиқа иримларга ишонишар экан. Ўзимизникилар ҳам улардан қолишмайди. Фикрлар моддийлашади, дегани шу бўлса ажабмас...

Ҳомиладорликдаги ҳангома
Америкалик актриса Жессика Альба 2008 йил тўнғич фарзандига ҳомиладорлигида жуда иримчи эди. Туғруққа қадар дўстларига дуо ўқилган чарм билагузукларни тарқатиб, “Болам туғилмагунча қўлингиздан ечманг!” дея илтимос қилган. Йўқса, фарзандига салбий таъсир кўрсатишига ишонган. 

Турмуш ўртоғига туз узатмайди
Актриса Кэтрин Зета-Жонс сира грим хонасида куйламас, ҳуштак ҳам чалмас экан. Бордию бехосдан ҳуштак чалиб юборса, елка оша туфлаб қўяркан. Бундан ташқари актриса дастурхон атрофида ўтирганида уришиб қолиш белгиси, дея ҳеч кимга, айниқса, турмуш ўртоғига туз узатайди.

Омадсизлик келтиради…
Актёр Роберт Паттисон қора мушук ва 13 рақамидан қўрқади. Роберт буларни омадсизлик белгиси сифатида қабул қилади.

Ўнг ва чап оёқнинг хосияти
Америкалик актриса Сальма Хайек болалигидан ўнг оёқ билан остона ҳатлашни ирим қилади. Чап оёғи билан қадам ташласа, омадсизликка дуч келар экан.

Қийшайган мих ва танганиниг сири
Опера хонандаси Лучано Паваротти ҳеч қачон чўнтагида эгилган мих ва оёқ кийимига солинган тангасиз саҳнага чиқмайди. Бу унинг муваффақиятли чиқиш қилиш белгиси.

Дарахтни тақиллатади
Актриса Николь Кидман ёмон ҳаёллар ҳақида ўйлагани ё бемаврид бирон гап айтиб юборганида доим дарахтни тақиллатади. Хонанда ва актриса Пэрис Хилтон ҳам худди Кидман каби йўл тутади. Шунингдек, 11:11 рақамини кўриб қолса, албатта ният қилади. Чунки бундай ҳолда нияти амалга ошишига ишонади.

Чарм рюгзак
Актриса Натали Портман биринчи гонорарига ҳарид қилган чарм рюкзагидан сира айрилмайди. Бу актрисага янги-янги роллар “ёмғир”ини олиб келар экан.

Бритни Спирс Меган Фоксни ўлимдан сақлайди
Актриса ва фотомодель Меган Фокс самолётда учишдан қўрқади. Учишга тўғри келиб қолса, то манзилига етгунча Бритни Спирснинг қўшиқларини тинглайди. Бу хонанданинг альбомини тинглаган одамнинг қисматига ҳалокат раҳна солмайди деган  фикрда. 

Омад келтирувчи оёқ кийимлар
Актриса Рейчел Вайс оёқ кийимларини ирим қилади. Нотўғри танланган туфли ўша куни унга бахтсизлик олиб келар экан. Қизиқ, қайси оёқ кийим унга омад олиб келишини қаердан билади?!

Леди Гагани чиндан севмаса…
Поп маликаси Леди Гага ижодининг муваффақиятли бўлишида уйқуни сабабчи деб билади. Агар ёнида юракдан яхши кўрмайдиган яқини ухламаса, санъатдаги омадини бой бериб қўяр экан. “Улар менинг қувватимни олиб қўяди”, дейди.

Майкл Жорданнинг керьерасини яратган кийим
Баскетбол бўйича дунё юлдузи Майкл Жордан учун «23» омадли рақам экан. Иккинчидан, унинг эски кўк шортиси доим унга омад олиб келар экан. Баскетболдаги карьерасига ҳам шу кийимини сабабчи деб билади. 

Басковни уйга қамаган бахтсизлик
Хонанда Николай Басков қора мушуклардан қўрқади. Кунларнинг бирида мушук сабаб тўрт чақирим масофани пиёда босиб ўтишига тўғри келган. Бувиси совға қилган кумуш тақинчоқни ўғирлатиб қўйгани учун бир неча кун уйидан чиқмаган. Айтишича, бу бахтсизлик белгиси эмиш.

Королева нима сабаб фамилиясини ўзгартирди?
Россия эстрада хонандаси Наташа Королева 13 рақамидан қўрққани учун ҳатто фамилиясини ҳам ўзгартирган. Ундан аввал асл фамилияси — Порывай билан ижод бошлаганди. Хонанданинг яқинлари “Исм-шарифинг 13 та ҳарфни ташкил этар экан”, дейиши бунга сабаб бўлган. Наташанинг айтишича, тахаллус билан иш бошлагач, омад у билан изма из юрган.

Аллегровани саҳнада расмга олиш мумкин эмас
Хонанда Ирина Аллегрова концерт вақтида расмга олишларини ёқтирмайди. “Саҳнада балиқдек сузаётган вақтимда расмга туширишса, менга кўз тегади”, дейди.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!