Ҳар соҳада биринчи бўлган 10 аёл

17:26, 06 апрель

Улар дунёдаги илк президент, учувчи, дастурчи, режиссёр ва Нобель мукофоти совриндори бўлган аёллардир. Бу аёллар бошқа аёлларга ҳар доим ибрат намунаси бўлиб келган, марҳамат, “lady.mail.ru” нашри сизни улар билан таништиради

Валентина Терешкова — биринчи аёл-космонавт

Валентина оддий деҳқон оиласида дунёга келган. Унинг онаси тўқимачилик комбинатида ишлагани боис, у ҳам вояга етгач шу комбинатда тўқувчи бўлиб ишлай бошлади. Валентинани доимо само ўзига тортгани боис, парашют спорти билан шуғуллана бошлайди. Ҳукумат космосга аёл кишини учиришни режалаштираётганини эшитиб, уни космонавтлар сафига қабул қилишлари учун бор кучини аямайди. У Россияда генерал-майор унвонига сазовор бўлган ягона аёлдир.

Маргарет Энн Балкли —биринчи жарроҳ аёл

XVII—XVIII асрларда тиббий маълумотга эга жарроҳ бўлиш учун эркак бўлиш талаб қилинган. Тиббиётда Бэрри Жеймс деб ном қозонган врач ўлимидан кейин ёриш учун тайёрланаётганда унинг... аёллиги маълум бўлган. Маргарет ўзига тўқ оилада туғилиб, ўсганидан муваффақиятли равишда турмушга чиқиши, оила қуриши мумкин бўлган бир пайтда севимли касби эгаси бўлиш истагида эркак қиёфасига кириб, шахсий ҳаётидан воз кечган.

Исабель Мартинес де Перон — биринчи президент аёл

У тунги клубларнинг бирида қувғинда юрган Аргентина президентини учратгунча актриса, раққоса бўлишни орзу қилган. Исабель Перон аввалига мамлакатнинг биринчи хонимига айланган бўлса, кейинчалик илк президент аёлга айланди. Уни президентнинг собиқ рафиқаси, хайрия ишлари билан шуғулланган Хуан Перон билан тенглаштиришса ҳам, Исабель тарихда илк аёл президент сифатида ном қолдирган.

Элиз де Ларош — биринчи учувчи аёл

У жуда қатъиятли аёл бўлганидан автоҳалокатга учраб, жиддий тан жароҳати олганига қарамай, парвоз қилишдан тўхтамаган. У нафақат илк учувчи аёл, балки узоққа ва баландликка учиш бўйича жаҳон рекордини ўрнатган инсондир. 

Мария Склодовская-Кюри — илк Нобель муофоти совриндори бўлган аёл

У физика ва математика бўйича икки маротаба Нобель мукофотини қўлга киритган. Мария турмуш ўртоғи билан радиоактив моддалар устида тадқиқотлар олиб борган. Бу тадқиқотлар учун у катта товон тўлаган, яъни соғлигидан ажраган. У Польшада оддий оилада туғилган, ҳаёти машаққатларда ўтган бўлса-да, полоний ва радийни кашф этиб,  дунё илм-фанига катта ҳисса қўшди.

Алис Ги-Блаше — биринчи режиссёр аёл

Ака-ука Люмьерлар биринчи фильмини суратга олгандан кейин орадан бир йил ўтар-ўтмас, Алис ўзининг “Карамли фаришта” фильмини суратга олди. Балки бунга унинг Gaumont кинокомпаниясида ишлагани қўл келгандир. Аммо оддий ҳарф терувчидан корхона раҳбари лавозимига кўтарилиш одамдан катта қобилият ва меҳнатсеварликни талаб қилади. Айнан Алиснинг хизмати билан ҳозирда биз севиб томоша қиладиган бадиий фильмлар дунёга келди.

Ада Лавлейс — илк дастурчи аёл 

Лорд Байроннинг қизи адабиётга эмас, балки математикага қизиқиб, механик ҳисоб машиналари учун алгоритм ёзиши ғалати ҳол.  Табиийки, XVIII асрда яшаган Аданинг электорон ҳисоблаш машинаси бўлмаган, аммо шунга қарамай, у шартли равишда илк дастурчи аёл номига сазовор бўлган.

Анна Щетинина — илк узоққа қатнайдиган кема капитани

Анна оддий матросликдан капитанликкача бўлган машаққатли йўлни босиб ўтган. У дунё аҳлини ҳайратда қолдириб, Гамбургдан Сингапурга оғир юк ортилган кемани бошқариб борган 27 ёшда бўлган. Анна 91 йиллик умри давомида капитан, порт бошлиғи, ўқитувчи, декан, доцент вазифаларида хизмат қилган ва бир қанча китоблар муаллифи бўлган.

Жоан Бенуа Самуэльсон — аёллар ўртасида ўтказилган илк олимпия марафони ғолибаси

1984 йилда турли югуриш мусобақалари ва марафонларда югуриш учун расман рухсат берилган ва у илк маротаба марафоннинг қонуний вакиласи сифатида иштирок этиб, ғалабага эришган.

Жанна Барре — дунё бўйлаб саёҳат қилган илк аёл

XVII асрда яшашнинг ўзи аёл киши учун жуда машаққатли кечган бўлишига қарамай, Жанна Барре кўзлаган мақсадига эришиш учун эркак кийимини кийиб, ботаник Флибер Коммерсоннинг хизматкори сифатида бутун дунёни айланиб чиққан. Унинг аёллиги фош этилган бўлса-да, жамият унинг ботаника фанига қўшган ҳиссасини тан олган.

Диққат, диққат! "Даракчи"нинг Telegram’даги расмий каналига аъзо бўлиб, янгиликлардан баҳраманд бўлинг!