Bugun, 22 noyabr kuni Parijdagi an`anaviy ravishda rasmiy tadbirlar o`tkaziladigan Faxriylar uyida rasmiy tashrif bilan Fransiya Respublikasida bo`lib turgan O`zbekiston Respublikasi Prezidenti Shavkat Mirziyoevni rasmiy kutib olish marosimi bo`ldi.
Maydonda oliy martabali mehmon sharafiga Fransiya Respublika gvardiyasi harbiy xizmatchilari saf tortdi. Harbiy orkestr ikki mamlakat davlat madhiyalarini ijro etdi. Gvardiyachilar davlatimiz rahbari oldidan tantanali yurib o`tdi.
Prezident Shavkat Mirziyoev va Fransiya tashqi savdo, iqtisodiy jozibadorlik va xorijdagi fransuz fuqarolarining ishlari bo`yicha vaziri Olive Besht faxriy qorovul safi oldidan o`tib, rasmiy delegasiyalar a`zolarini qutladilar.
Marosimdan so`ng O`zbekiston delegasiyasi Fransiya Prezidentining qarorgohi – Elisey saroyiga yo`l oldi. U erda oliy darajadagi ikki tomonlama muzokaralar bo`lib o`tadi.