Oliy Majlis Senati Matbuot xizmatining xabar berishicha, Tanzilla Narbaeva Rossiya Federasiyasi Federal Majlisi Davlat Dumasi raisi V.Volodinni qabul qilgan.
Uchrashuvda tomonlar ikki mamlakat o`rtasidagi hamkorlik aloqalari, xususan, savdo-iqtisodiy, investisiyaviy, innovasion, transport-logistika, agrosanoat, ilmiy-texnik sohalarda istiqbolli loyihalarni ilgari surish, ta`lim va madaniy-gumanitar almashinuvlarni kengaytirish hamda parlamentlararo hamkorlik masalalarini muhokama qilishgan.
Senat Raisi so`nggi yillarda ikki davlat o`rtasidagi parlamentlararo hamkorlik sohasidagi yutuqlar, jumladan, shu yilning oktyabr oyida Samarqand shahrida bo`lib o`tgan MDH Parlamentlararo Assambleyasining kuzgi sessiya yakunlari hamda ushbu sessiya MDH parlamentlari o`rtasidagi hamkorlik aloqalarini yangi bosqichini boshlab berganiga to`xtalib o`tgan.
O`z navbatida, Rossiya Federasiyasi Davlat Dumasi raisi V.Volodin parlamentlar imkoniyatlari doirasida ikkala davlat rahbarlari darajasida qabul qilingan qarorlarning ijrosini ta`minlash muhimligini ta`kidlab, bugungi kunda O`zbekiston Rossiyaning muhim iqtisodiy sherigi ekanligiga, mamlakatlar o`rtasida savdo aylanmasi o`sayotganligi va bundan kelib chiqib, transport, sanoat, turizm va boshqa sohalarda aloqalarni kuchaytirish zaruratiga urg`u bergan.
Uchrashuv davomida Xalqaro parlamentlararo tashkilotlar doirasida hamkorlikni yanada mustahkamlash muhimligi alohida qayd etildi. Shuningdek, halqaro va mintaqaviy ahamiyatga molik dolzarb masalalar yuzasidan ham fikr almashilgan.
