2-10-fevral kunlari Toshkent og`ir atletika bo`yicha navbatdagi Osiyo chempionatiga mezbonlik qilishi haqida xabar berilgan edi. Bugun chempionat o`z ishini boshlaydi.
Kecha qit`amizning 34 mamlakatidan 239 nafar sportchi ishtirok etadigan mazkur musobaqa oldidan "Yunusobod sport majmuasi"da matbuot anjumani tashkil etildi.
Tadbirda musobaqaning ahamiyati, jamoalarning tayyorgarligi haqida batafsil ma`lumot berildi. Uning Parij-2024 Olimpiya o`yinlariga qimmatli reyting ochkolarini taqdim etishi chempionatga bo`lgan qiziqishni yanada oshirgan.
Osiyo og`ir atletika federasiyasi vise-prezidenti, O`zbekiston Sport vazirining o`rinbosari, og`ir atletika federasiyasi raisining birinchi o`rinbosari Shahrullo Mahmudov hozirda bor e`tibor maksimal darajada Olimpiya o`yinlari lisenziyalarini qo`lga kiritishga qaratilgani, bu borada davlatimiz tomonidan barcha sharoitlar yaratib berilayotganini ta`kidladi.
Eslatib o`tamiz, musobaqaga O`zbekiston erkaklar terma jamoasi Ozarbayjonning Boku shahrida tayyorgarlik ko`rgan bo`lsa, qizlarimiz so`nggi mashg`ulotlarni Chirchiq shahrida o`tkazishdi.