Qurilish va uy-joy kommunal xo`jaligi vazirligida korrupsiyaga qarshi kurashish faoliyati samaradorligi tahlil qilindi. Bu haqda Korrupsiyaga qarshi kurashish agentligi xabar qildi.
Ma`lum bo`lishicha, davlat idoralarining korrupsiyaga qarshi kurashishdagi faoliyati samaradorligi reyting baholash natijalariga ko`ra, vazirlik 71 ball bilan “qoniqarli” toifadan joy olgan.
Tizimda 2023 yil 458 nafar shaxsga nisbatan 227 ta korrupsiyaviy jinoyat ishi sudlar tomonidan ko`rilgan.
Kapital qurilish sohasida sodir etilayotgan korrupsiyaviy jinoyatlarga asosan qalbaki hujjatlardan foydalanib mablag`larni o`zlashtirish, qonunbuzilish holatlariga ko`z yumish kabi omillar sabab bo`lmoqda.
Vazirlikning hududiy bo`linmalaridagi jami 40 nafar mansabdor shaxs tadbirkorlik faoliyati bilan shug`ullanib kelayotganligi aniqlandi.
Qurilish va uy-joy kommunal xo`jaligi sohasida nazorat qilish inspeksiyasi tomonidan aniqlanishicha, 2023 yilda respublika bo`yicha 1630 ta qurilish ro`yxatdan o`tkazilmagan.
Vazirlik markaziy devonida 2 nafar, Sirdaryoda 17 nafar, Namangan va Farg`ona viloyatlarida 9 nafardan mansabdor shaxs muqaddam korrupsiyaviy jinoyatlar uchun sudlangan.
Ochiqlik indeksining 2023 yil yakunlariga ko`ra, vazirlik 52,1 ball (maksimal 100 balldan) bilan vazirliklar kesimida 16-o`rinni egallagan holda “qizil” toifada qayd etilgan.
Davlat idoralarining korrupsiyaga qarshi kurashishdagi faoliyati samaradorligi reyting baholash natijalariga ko`ra, 71 ball bilan “qoniqarli” toifadan joy olgan.
Tahlillar natijasida aniqlangan korrupsiyani keltirib chiqaruvchi sabab va shart-sharoitlarni bartaraf etish choralarini ko`rish to`g`risida vazirlikka taqdimnoma kiritildi.