Markaziy bankning Bank nazorati qo`mitasi joriy yilning aprel oyidagi yig`ilishlarida (7 marta) 49 ta masalaniko`rib chiqdi va ular bo`yicha tegishli qarorlar qabul qildi.
Ro`yxatga olish va ruxsat berish yo`nalishida 34 ta, xususan, kredit tashkilotlari ustaviga kiritilgan o`zgartirishlarni ro`yxatdan o`tkazish (9 ta), kredit tashkilotlarining ustav fondidagi ulushiga egalik qilish uchun ruxsat berish (3 ta), mikromoliya tashkilotlari faoliyatini amalga oshiruvchi tashkilotlar reestriga kiritish (1 ta), mikromoliya tashkilotlariga berilgan lisenziyalarni qayta rasmiylashtirish (6 ta), auditorlarga malaka sertifikatini berish (2 ta) hamda tijorat banklari kuzatuv kengashi va boshqaruvi a`zolari, shuningdek, muhim ahamiyatga ega xodimlarining nomzodlarini ko`rib chiqish (13 ta) bilan bog`liq masalalar muhokama qilindi.
Shu bilan birga, banklar va to`lov tashkilotlarida Markaziy bankning ko`rsatmalari va prudensial me`yorlari talablarining bajarilishi, banklar va mikromoliya tashkilotlarida o`tkazilgan tekshirishlar natijalari (15 ta masala) ham muhokama qilindi.
Tijorat banklari va mikromoliya tashkilotlarida o`tkazilgan o`rganishlar natijasida aniqlangan qoidabuzarliklar uchun 16 ta bank va 2 ta mikromoliya tashkiloti chora va sanksiyalar qo`llanilishi to`g`risida ogohlantirildi.
Shuningdek, ustav kapitalining miqdori “Banklar va bank faoliyati to`g`risida”gi Qonun talablariga muvofiqlashtirilmaganligi sababli 4 tabankning ayrim operasiyalari cheklandihamda amaldagi qonunchilik va Markaziy bank tomonidan o`rnatilgan iqtisodiy me`yorlar talablariga rioya qilinmaganligi va aniqlangan qoidabuzarliklar uchun 9 ta bankka nisbatan jarima sanksiyalari qo`llandi.
Bundan tashqari, Qo`mita tomonidan bank tizimi barqarorligini saqlash, omonatchilar va investorlar huquqlarini himoya qilish prinsipidan kelib chiqib, tijorat banklari boshqaruvlari va mikromoliya tashkilotlari rahbariyatlariga aniqlangan kamchiliklarni tuzatish, ular bo`yicha tegishli chora-tadbirlar ishlab chiqish, o`rnatilgan prudensial normativlarga amal qilish, bank faoliyatida mavjud zaifliklarni bartaraf etish va moliyaviy holatini sog`lomlashtirishga qaratilgan talablarga rioya qilish yuzasidan tegishli ko`rsatmalar berildi.
