Иқтисодиёт ва молия вазирлиги 2023 йил якунлари бўйича даромадлар ижроси дастлабки маълумотларини эълон қилди.
Унга кўра, 2023 йилда давлат бюджети даромадлари 231,7 трлн.сўмни ташкил этган.
"Бу 2022 йил кўрсаткичларидан 14,8%га кўп холос. Яъни, бюджет даромадлариниинг ўсиши ЯИМ номинал ўсишидан анча ортда қолган. Солиштириш учун 2022 йилда бюджет даромадлари 22,5%га ўсган эди", - дейди bakiroo маълумот таҳлил қилар экан.
Иқтисодчининг шарҳига кўра, даромадлар таркибида айланмадан олинадиган солиқлардан тушумлар 4,0%га қисқарган бўлса, фойда солиғидан тушумлар инфляциядан паст, 8,5% даражасида ўсган холос. Энг асосий солиқ ҚҚСдан тушумлар 10,9%га ўсган (2022 йилда 35,9%лик ўсиш юз берган). Бир сўз билан айтганда, сон саноқсиз, самарасиз ва яқин дўстларга тақдим этилаётган солиқ имтиёзларининг салбий таъсири яққол натижа кўрсата бошлаган.
Энг катта ўсиш божхона божларидан (68,5%га) тушумларда кузатилган. Импортнинг кескин ўсиши бож тушумларини ошишига туртки берган. Юқори суръатда индексация қилиб келинаётган ер солиғидан тушумлар 30,2%га, мулк солиғидан тушумлар 27,5%га ўсган.
"Қайд этиш керакки, бу фақат давлат бюджети маълумотлариниинг даромадлар қисми холос (харажатлар қисми дастлабки маълумотлари энди тақдим этилса керак). Консолидациялашган бюджетнинг 2023 йил 9 ойлик якунлари ҳалигача очиқлангани йўқ", дейди мутахассис.