Флорида федерал судяси Эйлин Каннон АҚШнинг собиқ президенти Дональд Трампнинг махфий ҳужжатлар билан нотўғри муомала қилгани бўйича 20 майга белгиланган тингловни бекор қилди. Янги синов санаси ҳали танланмаган, деб хабар беради АП.
Каннон ўз қарорини кеча, 7 май куни қабул қилди. У томонидан имзоланган беш саҳифалик ҳужжатда ҳозир янги суд санасини белгилаш "ақилсизлик" бўлиши айтилган. Агентлик таъкидлаганидек, бу қарор федерал прокурорларнинг Трампни ноябрдаги президентлик сайловлари олдидан судга олиб чиқиш имкониятини шубҳа остига қўяди.
Эслатиб ўтамиз, собиқ президент 2022 йилда Флоридадаги Мар-а-Лаго қароргоҳида топилган махфий ҳужжатларга бепарволик билан муносабатда бўлганликда гумон қилинмоқда. Сиёсатчига қарши яна бир қанча жиноий иш қўзғатилмоқда: 2021 йил январида унинг тарафдорлари томонидан Капитолийга бостириб кириши, ҳужжатларни қалбакилаштириш, шунингдек, унинг бизнеси билан боғлиқ қонунбузарликлар ҳақида. Апрел ойида ЁуГов сўрови шуни кўрсатдики, америкаликларнинг 57 фоизи Дональд Трампнинг қонунбузарликларини оғир жиноят деб билади.
