Ўзбекистонда икки ойда қанча оилавий боғча ташкил этилганлиги маълум қилинди. Бу ҳақда Мактабгача ва мактаб таълими вазирлиги маълумот берди.
Ушбу муддатда мамлакатда умумий ҳисобда 1 155 та оилавий нодавлат мактабгача таълим муассасаси ташкил этилган. Энг кўп боғча Наманган вилоятида очилган – 206 та. Фарғона вилоятида 189 та, Самарқанд вилоятида эса 141 та оилавий боғча ташкил этилган.
Бу муддат ичида энг кам оилавий боғча ташкил этилган ҳудуд эса Қашқадарё вилояти – 21 та. Хоразм вилоятида 22 та, аҳоли нисбатан кам яшайдиган ҳудудлар – Навоий ва Сирдарё вилоятларида мос равишда 37 та ва 63 та оилавий боғча очилган.
Туманлар кесимида Наманган вилоятининг Тўрақўрғон ва Уйчи туманлари етакчилик қилган: ушбу ҳудудларда мос равишда 36 та ва 35 та оилавий нодавлат мактабгача таълим муассасаси ташкил этилган.
