Ижтимоий тармоқларда Тошкент шаҳрининг Сергели туманида бир қанча фуқаролар жанжаллашаётгани акс этган видео тарқалди.
Тасвирларда одамларнинг шовқин-сурони ва сўкингани, айримлари бошқаларининг ортидан қувганини кўриш мумкин. Воқеа иштирокчиларидан бири эса автомобилни одамлар устига ҳайдаган.
Пойтахт Ички ишлар бош бошқармасининг маълум қилишича, ҳолат 3 июль куни тахминан соат 23:00 атрофида туманнинг Қўйлиқ-5 даҳасида содир бўлган. Ўзаро таниш бўлган бир нечта фуқаролар — К.Ф., Б.А., Т.Ж., Ф.Р. ва И.У. оғзаки келишмовчилик сабабли жанжаллашиб кетишган.
Бош прокуратура матбуот котиби Ҳаёт Шамсутдиновнинг darakchi.uz'га маълум қилишича, жанжалда тўрт киши — 47 ёшли Т.Ж., 22 ёшли Ф.Р., 20 ёшли I.У. ва 19 ёшли Б.П. жароҳатланган. Воқеа соат тахминан 19:00 атрофида 19 ёшли Б.П.дан унга олдиндан таниш бўлган К.Ф. ҳеч қандай сабабларсиз 1 млн сўм пул талаб қилганидан бошланган.
Ҳолатни жабрланган йигит ўзининг уч нафар танишига етказган ва улар BYD Song Plus автомобилида келган. Шу ерда бўлган К.Ф. ва Б.А. ҳамда ҳозирда шахсини аниқлашнинг имкони бўлмаган 3 нафар шахс жабрланувчилардан 1 млн сўмни ҳеч қандай арзигулик сабабларсиз талаб қилгани сабабли ўзаро жанжаллашган ва пул талаб қилган. Сўнгра улар тўрт нафар жабрланувчи танасининг турли жойларига тан жароҳатлари етказган.
Пул талаб қилган шахслар жароҳат олган жабрланувчилар қочиш учун автомашинада ҳаракатланган пайти фаол қаршилик кўрсатган. Автомашинанинг турли ерларига қўл ва оёқлари билан зарба бериб, автомашинани носоз ҳолатга келтирган.
ИИБ ходимлари К.Ф.ни яшаш хонадонидан ҳодиса содир бўлган ерга чақирганда у такроран ИИБ ходимларининг талабларига бўйсунмасдан ёнида бўлган "пакки" пичоғи билан ўзига ва бошқаларга тан жароҳати етказиш билан қўрқитган. Шу ерда бўлган ходимларга олдига келмасликни айтиб, агарда келса, пичоқ билан тан жароҳати етказишини билдириб, ИИБ ходимларига турли ҳақоратомуз сўзларни айтган.
Сўнг ўзининг бўйин соҳаси ўнг томонига пичоқ билан тан жароҳати етказган. ИИБ ходимларининг саъй-ҳаракатлари билан унинг қўлидаги пичоқ олиб қўйилган.
Ҳолат юзасидан гумондор шахслар ушланиб, Жиноят кодексининг 277-моддаси (Безорилик) билан жиноят иши қўзғатилган. Ҳозирда тергов ҳаракатлари давом этмоқда.
