Хабарингиз бор, йил бошида “ЎЗБЕККИНО” Миллий агентлиги буюртмасига асосан “EZGU-FILM” студияси томонидан суратга олинаётган, II Жаҳон урушидаги Ғалабанинг 75 йиллигига бағишланган “ИЛҲАҚ” тарихий бадиий фильми реал воқеалар асосида ишланаётгани хабар қилинган эди.
«Ўзбеккино» МА буюртмасига биноан суратга олинган, режиссёр Жаҳонгир Ахмедовнинг «Илҳақ» филмининг расмий трейлери эълон қилинди.
Фильмда Тошкент вилоятининг Зангиота тумани, Хонобод қишлоғилик Зулфия ая Зокирова тақдири хусусида ҳикоя қилинган. Зулфия аянинг беш ўғли: Холматов Исоқжон, Холматов Аҳмаджон, Холматов Муҳаммаджон, Холматов Ваҳобжон, Холматов Юсуфжонлар урушдан қайтмаган.
"Илҳақ" бадиий фильми ушбу аянчли тақдирлар ҳақида. Фильмнинг яратилиши ғояси Ўзбекистон Республикаси Президенти Шавкат Мирзиёев томонидан таклиф қилинган.
Фильмнинг суратга олиш ишлари жорий йилнинг март ойида якунланди. Тасвирга олиш жараёнлари давомида картинада 200 дан ортиқ киши иштирок этди. Бундан ташқари, «Ўзеккино» МА томонидан фильмнинг мураккаб уруш саҳналари «Беларусьфильм» билан ҳамкорликда Беларусда суратга олиниши ташкиллаштирилди. Айнан шу ерда Зулфия Зокирова ўғилларининг жанггоҳлардаги қаҳрамонлиги ва жасоратини акс эттирувчи саҳналар суратга олинди.
Жаҳонгир Аҳмедовнинг "Илҳақ" бадиий фильмининг бир қисми "Белорусфильм" билан ҳамкорликда суратга олинди.
Пандемияга қарамай, «Ўзбеккино» МА ва киностудиянинг ижодий жамоалари зарур хавфсизлик қоидаларига риоя қилган ҳолда Ўзбекистоннинг Иккинчи жаҳон урушида фашизм устидан қозонилган ғалабага қўшган улкан ҳиссасига бағишланган қатор киноасарлар яратиш устида ишларни давом эттиришмоқда.
Уруш мавзусидаги кино тақдимотлар орасида режиссёр Али Ҳамроевнинг кинохроник кадрларга асосланган, тўрт қисмли «Халқ жасорати» кино эпопеяси, шунингдек, режиссёр Ҳамидулло Хасановнинг Голландия Амерсфорт концентрацион лагеридаги 101 нафар ўзбек-ҳарбий асирларига бағишланган, фашизмга қарши курашишда иштирок этган ўзбеклар номини абадийлаштириш учун Анвар Эргашев ва Юлия Медведьеванинг шу номли романи асосида суратга олинган «101» бадиий фильми ҳам бор.
