Республика комиссияси томонидан тегишли чекловлар ўрнатилган ҳудудларда аҳоли томонидан эрталаб соат 7:00 дан 10:00 гача ҳамда кечқурун 17:00 дан 20:00 гача шахсий автомашиналардан фойдаланишга рухсат берилади. Бу ҳақда бугун бўлиб ўтган видеоселектор йиғилишида маълум қилинди.
Президент Шавкат Мирзиёев иштирок этган йиғилишда аҳоли орасида касалликка чалиниш динамикаси пасайиб бораётганини инобатга олиб, фуқароларимиз томонидан шахсий автотранспортдан фойдаланишга чекловларни ҳам секин-аста юмшатиш мақсадга мувофиқлиги айтилди.
Шахсий автомашиналардан, биринчи навбатда, иш жойига, тиббиёт муассасаларига бориш ва уйига қайтиш, истеъмол маҳсулотлари, дори-дармон ва тиббий буюмларни харид қилиш мақсадида фойдаланиш керак.
Махсус рухсатномаларга (стикерларга) эга ва етказиб бериш хизматини кўрсатаётган фуқаролар эса шахсий автотранспортда ҳеч қандай чекловсиз ҳаракатланиши мумкин.
Шунингдек, олимларимиз, илмий-тадқиқот институтлари ходимлари, профессор-ўқитувчилар санитария-гигиена нормаларини таъминлаган ҳолда ўз лаборатория ва кафедраларида кундалик ишларини давом эттиришларига ижозат берилади.
"Албатта, вазиятимиз яхшиланиб, ижобий томонга ўзгариб бориши билан, 10 майдан кейин биз карантин режимини босқичма-босқич юмшатишга қаратилган ишларимизни янада дадилроқ давом эттирамиз.
Лекин такрор ва такрор айтаман: ҳамма жойда санитария талабларига амал қилишга биринчи даражали масала деб қарашимиз керак.
Агар бу талабларга барчамиз қатъий амал қилмасак, санитария-карантин нормаларига аҳамият бермасак, шунча қилган ишларимиз, кўрган чора-тадбирларимиз зое кетиши ҳеч гап эмас", деди давлат раҳбари йиғилишда.
Аввалроқ ИИВ Матбуот хизмати раҳбари Шохруҳ Ғиёсов Ўзбекистонда карантин чораларини босқичма-босқич юмшатиш мақсадида айрим эҳтиёжлар юзасидан маълум муддатга фуқароларнинг кўчага чиқишлари учун рухсат берилиши ҳақида хабар қилганди.
