Sal avval Qibray tumanida sayohat jomadonidan murda topilgani, marhum Oliy sudning sobiq xodimi ekaniga oid xabar berilgan edi. Ayni paytda Bosh prokuratura Matbuot xizmati rahbari Hayot Shamsutdinovning "darakchi.uz"ga ma`lum qilishicha, holat bo`yicha qo`zg`atilgan jinoyat ishi («qasddan odam o`ldirish», 97-modda) bo`yicha ikki nafar shaxs qo`lga olindi.
Voqea tafsitlotlariga ko`ra, marhum Sh.A. shu yilning 7 avgust kuni ertalab shaxsiy «Gentra» avtomashinasida o`z uyidan Toshkent shahridagi Respublika Shoshilinch tez tibbiy klinik (sobiq 6-sonli) shifoxonasiga (RShTYoIM) ko`rikdan o`tish uchun tanishi R.X. (1975 yilda tug`ilgan) oldiga kelgan.
2009 yildan buyon RShTYoIM bo`lim rahbari lavozimida ishlab kelayotgan R.X. o`ziga avvaldan tanish bo`lgan Sh.A.ni ko`rikdan o`tkazish jarayonida eski adovatlarni eslaydi. Shuningdek, uning (marhumning) shu dargohda ishlovchi shar`iy xotini haqida gap ketib, ikki o`rtada kelishmovchilik kelib chiqadi.
Shifokor R.X. bemor odamga nisbatan qanday xatti-harakatlar qilinsa, oqibati o`lim bilan tugashini mutaxassis sifatida yaxshi bilgani bois «raqibi»ning sog`lig`idan shikoyat qilib kelganligidan foydalanib, uni bo`sh xonaga olib kiradi va tibbiyot kushetkasiga yotqizadi. Ayni jarayonda uning bosh qismiga qattiq tumtoq jism bilan bir marotaba urib, so`ng bo`g`ib qasddan o`ldiradi.
Jinoyatni yashirish maqsadida Sh.A.ning jasadini o`zida mavjud bo`lgan qora rangli sayohat jomadoniga joylab, tanishi, 1964 yilda tug`ilgan A.M. yordamida o`zining qora rangli «Gentra»sida Qibray tumanining «Sohibkor» hududidan oqib o`tuvchi Bo`zsuv kanaliga tashlab yuboradi.
Shuningdek, ular marhumning qo`l sumkasidagi 660 ming so`m va 230 AQSh dollari miqdoridagi pullarni olib, shaxsiy hujjat hisoblangan fuqarolik pasporti, haydovchilik va xizmat guvohnomalarini qaychi yordamida bo`laklarga bo`lib, suvga oqizib qasddan yo`q qilishgani ham aniqlandi.
Tergov jarayonida R.X.ga tegishli avtomashinaning yukxonasi atrofida qirilishlar, undagi (yukxonadagi) va RShTYoIMdagi xonasining er va devor qismlaridan olingan qonga o`xshash dog`lar ashyoviy dalil tariqasida olingan. Ayni paytda sudga bir necha ekspertizalar tayinlangan.
Qo`lga olinganlarga nisbatan qotillik va boshqa qator ayblovlar e`lon qilinib, «qamoqqa olish» tarzidagi ehtiyot chorasi qo`llangan.
Bosh prokuratura nazoratiga olgan mazkur jinoyat ishi bo`yicha tergov harakatlari Toshkent viloyati prokuraturasi (o`ta og`ir jinoyatlarni tergov qilish bo`limi) tomonidan olib borilmoqda.
