Bir muddat avval taniqli estrada xonandasi Samarqanddagi liseyning birinchi kursini endigina tamomlagan, voyaga etmagan qizning nomusiga tekkani haqida xabar qilingan edi. Shundan so`ng, Bosh prokuratura holat yuzasidan qayta tekshiruv tayinlanganini ma`lum qilgan edi.
Qo`shimcha tergovga qadar tekshiruv harakatlari natijasiga ko`ra, holat yuzasidan Jinoyat kodeksining 118-moddasi (Nomusga tegish) bilan jinoyat ishi qo`zg`atildi. Buni jabrlanuvchining yaqinlari va ichki ishlar idoralaridagi manba tasdiqladi, deb yozdi Kun.uz.
Dastlabki tergov harakatlarini Samarqand viloyat IIB Tergov boshqarmasi olib borayotgani aytilmoqda.
«Vaziyatni prokuratura nazoratga olgach, Kattaqo`rg`on tumaniga borib, hodisa sodir bo`lgan uy IIB vakillari hamrohligida o`rganildi. 10 oktyabr kuni jinoyat ishi qo`zg`atildi. Shundan so`ng tergovga chaqirishdi. Tergovga J.U. ham chaqirilgandi, ammo o`sha voqea sodir bo`lgan kunda xonandaning yonida turgan ikki sherigi keldi, xolos.
Istardikki, bu safar tergov bir tomonlama bo`lib qolmaydi, xolislik ta`minlanadi», – deydi qizning otasi.
Viloyat IIB:
«Haqiqatan ham qiz o`sha kuni o`zini zo`rlangani haqida aytmoqda. Zo`rlash va nomusga tegish alomatlari bo`lgani sababli joriy yilning 10 oktyabrida holat yuzasidan jinoyat ishi qo`zg`atildi. Hozirgi vaqtda dastlabki tergov harakatlari olib borilmoqda.
Inson sha`ni va qadr-qimmati bilan bog`liq bo`lgani sababli tergovning boshqa tafsilotlari oshkor qilinmaydi. Tergov yakuniga ko`ra, qonuniy qaror qabul qilinishi ta`minlanadi», – degan viloyat IIB rasmiysi.
Ijtimoiy tarmoqlarda ushbu xonanda Jasur Umirov ekani haqida ko`plab taxminlar paydo bo`lgan. Shundan so`ng xonanda ijtimoiy tarmoqdagi sahifasida bu haqda yozdi:
“Aybim bir stolda shunaqa buzuqlar bilan o`tirib qolganiim. Tuxmat balosini endi ko`rdim”, – deya o`zining vaziyatga aloqadorligiga ishora qilib izoh qoldirgan xonanda.
Ma`lumot uchun: jinoyat kodeksining 118-moddasiga ko`ra, nomusga tegish, ya`ni zo`rlik ishlatib, qo`rqitib yoki jabrlanuvchining ojizligidan foydalanib, jinsiy aloqa qilish, sodir etilgan jinoyatning og`irlik darajasiga qarab 3 yildan 20 yilgacha ozodlikdan mahrum qilish bilan jazolanadi.
