my5
Sevimli

“O`zbekneftgaz”: Rossiyaning “VEB.RF” Davlat rivojlanish korporasiyasi bilan 650 million dollarlik o`zaro anglashuv Memorandum imzolandi

Iqtisodiyot 23.11.2020, 17:33
“O`zbekneftgaz”: Rossiyaning “VEB.RF” Davlat rivojlanish korporasiyasi bilan 650 million dollarlik o`zaro anglashuv Memorandum imzolandi

“O`zbekneftgaz” AJ Rossiyaning “VEB.RF” Davlat rivojlanish korporasiyasi bilan birgalikda uglevodorodlar ishlab chiqarishni ko`paytirish dasturining ikkinchi bosqichini moliyalashtirish masalasi ustida ish olib bormoqda.  Bu haqda jamiyatning Matbuot xizmati xabar berdi.

“O`zbekneftgaz” AJ rahbariyatining Moskvaga tashrifi doirasida “VEB.RF” Davlat rivojlanish korporasiyasi vakillari bilan uchrashuv bo`lib o`tdi. 
Uchrashuvda tomonlar ikki tomonlama hamkorlikning ahamiyati va samaradorligini alohida ta`kidladilar.

O`zaro manfaatli hamkorlikni yo`lga qo`ygan birinchi qadam Rossiyaning yuqori texnologik mahsulotlarini etkazib berishni moliyalashtirish, “O`zbekneftgaz” AJning ishlab chiqarish quvvatlarini modernizasiyalashga qaratilgan xizmatlarni ko`rsatish uchun kredit liniyasining ochilishi edi.

Uchrashuv davomida tomonlar kelishilgan maqsadlarni amalga oshirishning keyingi qadamlari va belgilangan muddatlari to`g`risida o`zaro anglashuv Memorandumni imzolashdi.

Memorandum O`zbekiston Respublikasida amalga oshirilayotgan uglevodorod xomashyosini qazib chiqarishni ko`paytirish dasturini amalga oshirishni moliyalashtirish uchun asos bo`lib xizmat qiladi. Loyihaning maqsadi – mamlakat iqtisodiyot tarmoqlari va aholisini etarli miqdorda energiya resurslari bilan ta`minlashdan iborat.

Eslatib o`tamiz, Memorandum 650 mln dollar miqdorida kredit liniya ajratish bo`yicha indikativ shartlarni kelishish uchun imzolandi

Ma`lumot uchun: “VEB.RF” – bu Rossiya Federasiyasining Davlat rivojlanish korporasiyasi bo`lib, uning asosiy vazifasi Rossiyaning uzoq muddatli iqtisodiy rivojlanishiga hissa qo`shishdir. “VEB.RF” tijorat banklari bilan hamkorlikda infratuzilmani, sanoatni, ijtimoiy sohani rivojlantirish, texnologik salohiyatni mustahkamlash va odamlarning turmush sifatini yaxshilashga qaratilgan yirik loyihalarni moliyalashtiradi.

Шарҳлар