So`nggi yillarda keng jamoatchilik, ayniqsa ommaviy axborot vositalarida “iste`mol savatchasi” degan tushuncha ko`p muhokamlarga sabab bo`lmoqda.
Xo`sh, “iste`mol savatchasi” nima o`zi? U nimalardan iborat. Bizning turmushimizda qanday ahamiyat kasb etadi?
“Iste`mol savatchasi” – insonning normal hayot kechirishi uchun zarur bo`lgan oziq-ovqat va nooziq-ovqat tovarlar hamda xizmatlarning eng minimumini o`z ichiga oluvchi kategoriyadir. Ya`ni ma`lum bir davlat tomonidan o`z fuqarolarining normal yashashi uchun zarur bo`lgan oziq-ovqat va nooziq-ovqat mahsulotlar hamda xizmatlarning eng kam miqdorini belgilashidir.
Soddaroq aytganda, “iste`mol savati”ga kiritilgan tovar va xizmatlar yashash uchun zarur bo`lgan eng muhim ehtiyojlaringizni qondirishga etishi kerak. Aksariyat taraqqiy etgan mamlakatlarda aholiga beriladigan ijtimoiy nafaqalar aynan “iste`mol savatchasi”ga, unda qayd etilgan ko`rsatkichlarga ko`ra belgilanadi.
Shuningdek, ayni bir davlat tomonidan ishlab chiqilgan “iste`mol savatchasi” boshqa bir mamlakat uchun to`liq andoza bo`la olmaydi. Uni ishlab chiqishda mamlakatning iqlim sharoiti, aholi ehtiyoji, shuningdek mahalliy aholining an`ana va odatlari ham alohida rol o`ynaydi. Bugungi kunda “iste`mol savatchasi”ning yagona maqbul varianti mavjud emas.
Misol uchun AQShdagi iste`mol savatiga 300 ta, Buyuk Britaniyada 350, Germaniyada 470 mahsulot va xizmat kiritilgan.
Bu mahsulotlarning oziq-ovqat turiga kiradiganlarining asosiylari non va un mahsulotlari, sut va sut mahsulotlari, yog`, go`sht, tuxum, poliz mahsulotlari, meva-chevalar va boshqalarni tashkil etadi.
Nooziq-ovqat mashulotlariga ko`ylak, kostyum, poyabzal, bosh kiyim, paypoq, ichki kiyim turlari, sanitariya va gigiena mahsulotlari, maktab va ta`lim olish uchun zarur tovarlar kiritiladi.
Sovuq mamlakat uchun qishda issiqlik ta`minoti iste`mol savatidagi eng muhim xizmat hisoblansa, Afrikaning ayrim mamlakatlari uchun bu xizmatning umuman keragi yo`q.
O`zbekiston iste`molchilar huquqlarini himoya qilish jamiyatlari federasiyasi tomonidan keng jamoatchilik fikriga tayanib, respublikamizning milliy “iste`mol savatchasi” loyihasi ishlab chiqilmoqda. Bu haqda "Darakchi"ga Federasiya matbuot kotibi ma`lum qildi.
Mazkur tashabbus jamoatchilik tashkiloti sifatida Federasiyaning respublikamizda olib borilayotgan keng qamrovli islohotlarga o`zining munosabati sifatida gavdalanadi.
Federasiya keng jamoatchilikdan milliy “iste`mol savatchasi” loyihasi ishlab chiqishda faol ishtirok etishni so`rab qoladi. Buning yo`li oson.
https://www.survio.com/survey/d/Y8W9V3O5A9Y9Z7A7L elektron manzili orqali so`rovnomada ishtirok eting va milliy “iste`mol savatchasi” loyihasi ishlab chiqilishiga o`z hissangizni qo`shing.
