my5
Sevimli

Byudjet muassasalari rahbarlari qonun buzilishi holatlariga yo`l qo`ygan taqdirda jinoiy javobgarlikkacha choralar ko`riladi

Jamiyat 26.11.2020, 14:10
Byudjet muassasalari rahbarlari qonun buzilishi holatlariga yo`l qo`ygan taqdirda jinoiy javobgarlikkacha choralar ko`riladi

Xabaringiz bor, Davlatimiz rahbari tomonidan joriy yilning 12-13 noyabr kunlari Qashqadaryo viloyatiga qilingan tashrif yakunlariga ko`ra, viloyatni ijtimoiy-iqtisodiy rivojlantirish uchun byudjetdan pul mablag`lari ajratilishi belgilandi.

Byudjet mablag`larining qonuniy, maqsadli va to`g`ri sarflanishi hamda bu borada shaffoflikni ta`minlash esa bu borada ko`zlangan natijalarga erishishning muhim omili sanaladi.

Korrupsiyaga qarshi kurashish agentligi direktori Akmal Burxonov va Hisob palatasi raisining o`rinbosari Saidlaziz Saidkarimov ishtirokida Davlat byudjeti mablag`lari mahalliy davlat hokimiyati va boshqaruv idoralari tomonidan noqonuniy sarflanishining oldini olish bo`yicha viloyatdagi o`rganishlar yuzasidan Qashqadaryo viloyati hokimligida o`tkazilgan yig`ilish ham shu masalalarga bag`ishlandi.

Bu haqda O`zbekiston Respublikasi Bosh prokuraturasi jamoatchilik bilan aloqalar va huquqiy axborot bo`limi boshlig`i Hayot Shamsutdinov xabar qildi.

Ochiq va tanqidiy ruhda o`tgan yig`ilishda viloyat prokurori Erkabay  Tadjiev kun tartibidagi masala yuzasidan murojaatnoma yo`lladi. Shuningdek, E.Tadjiev ezgu maqsadlarga yo`naltirilayotgan ushbu pul mablag`larining maqsadli ishlatilishi uchun har bir mas`ul shaxs ham xalqimiz, ham vijdoni oldida javobgar ekanini, viloyat prokuraturasi organlari tomonidan byudjet mablag`larining talon-toroj etilishini va bu borada korrupsion holatlarni oldini-olish maqsadida viloyat prokuraturasida “Vaziyatni tizimli monitoring qilish” guruhi tashkil etilib, monitoring guruhi tomonidan byudjet muassasalari rahbarlari qonun buzilishi holatlariga yo`l qo`ygan taqdirda jinoiy javobgarlikkacha choralar ko`rilishi haqida rasman ogohlantirilganini ma`lum qildi.

Yana ta`kidlandiki, monitoring guruhi tomonidan kelgusida:

  • Byudjet mablag`larining maqsadli sarflanishiga mas`ul va javobgar idoralar faoliyatidagi qonuniylik ahvolini kunlik tahlil qilinadi;
  • Idora va tashkilotlarda korrupsiyaga qarshi ichki nazorat tizimi faollashtiriladi;
  • Statistik ma`lumotlar va tahliliy axborotlar o`rganilib, bu boradagi faoliyat muvofiqlashtiriladi;
  • Korrupsiya va byudjet mablag`larining talon-toroj etilishiga doir murojaatlarni qabul qilish uchun maxsus “telegramm bot” tashkil qilinadi;
  • Prokuratura organlarining korrupsiyaga qarshi kurashda amalga oshirayotgan ishlari, aniqlanayotgan qonunbuzarliklar haqidagi ma`lumotlar ochiqlik, oshkoralik va shaffoflikni ta`minlash maqsadida ommaviy axborot vositalari va internet-saytlar orqali yoritib boriladi.

Darhaqiqat, qonun buzilishining o`zi bilan emas, balki sabablari va yuzaga kelishiga imkon berayotgan shart-sharoitlarga qarshi kurashish uning oldini olishdagi eng to`g`ri choradir. Yuqoridagi amaliy tadbirlar esa huquqbuzarliklarning, ayniqsa, byudjet mablag`lari sarflanishidagi korrupsion holatlarning oldini olishda ijobiy samaradorlikka erishishga xizmat qiladi.

Шарҳлар