Jizzax viloyati G`allaorol tumanida xonadonlarning birida istiqomat qiluvchi 69 yoshli onaxon 24 noyabr kuni ertalab hovlisidagi 28 metr chuqurlikdagi suv qudug`iga ehtiyotsizlik oqibatida tushib ketgani haqida xabar qilgan edik. Biz ana shu voqea joyida bo`ldik. Voqea guvohlari, qutqaruvchilar bilan suhbatlashib, batafsil ma`lumot olishga harakat qildik.
Voqea guvohlarining ma`lum qilishicha, bu holatni eng avval o`sha quduq atrofida yurgan nevarasi ko`rib qolgan. Avvaliga qo`ni-qshnilar bilan o`zlari qutqarishga urinishgan. Ammo harqancha urinishmasin, arqon uzilib ketaverib, o`zlari qutqarishni eplay olmagach, soat 07:30 da Favqulodda vaziyatlar bo`limiga qo`ni-qo`shnilar qo`ng`iroq qilishib, voqea haqida xabar berishgan va yordam so`rashgan. Voqea joyiga 20 daqiqa G`allaorol tumani Favqulodda vaziyatlar bo`limi boshlig`i o`rinbosari Bahodir Norboboev boshchiligidagi 3 nafar 6-son qutqaruvchilari etib borishgan. Tezkorlikda qutqaruvchi Shodiyor HAYDAROV arqon yordamida quduqqa tushirilgan.
Shodiyor HAYDAROV, G`allaorol tumani FVB qutqaruvchi:
– Biz xodimlarimiz bilan voqea joyiga kelganimizda atrofda ko`pchilik quduqqa qarab intilishayotgan edi. Suv to`kilishi oqibatida quduq atrofini juda ham qalin muz qoplab olgan edi. Quduq ichida buvisini qutqarish uchun tushgan nevarasi ko`p urinishiga qaramay, olib chiqa olmaganligi ko`rinib turardi. So`ngra nevarasini bir amallab quduqdan chiqarib oldik va menga quduqqa tushishim aytildi. Hech ikkilanmay arqonga osilgan holda tushdim. Tushgan paytimda onaxonning boshi suvga botib turgan va juda ham holsiz edi. Biroq shunday bo`lsa-da, aytgan gaplarimga javob berishga harakat qildilar. 28 metr chuqurlikda to`rt metr balandlikkacha suv bor edi, suvning ustida suv tortib chiqarish uchun motorcha bor ekan. Quduqning diametri bir metr bo`lganligi sabab biroz noqulayliklar ham bo`ldi. Pastliqda havo olish ancha mushkul edi. Shunday bo`lsa-da, onaxonning beliga arqon bog`lab yuqoriga chiqarib oldik. Men bunday voqeaga to`rt yil mobaynida birinchi marotaba duch keldim. Yuqorida havo harorati juda ham sovuq bo`lsa-da, quduq ichidagi suv biroz iliqligi bois onaxon suvda muzlab qolmagan.
Biz onaxonning o`zi bilan ham suhbatlashmoqchi edik, ammo ayrim sabablarga rozi bo`lishmadi. Onaxon arqon yordamida yuqoriga olib chiqilganidan so`ng tibbiyot xodimlariga topshirilgan. Qo`shnilarining so`zlariga qaraganda, ayni paytda onaxonning sog`liklari yaxshi.
Jurnalist Nabijon ERGAShEV, tasvirchi Islom MURODOV
darakchi.uz sayti uchun maxsus Jizzaxdan
“Sevimli” telekanalining “Zamon” informasion dasturi bilan hamkorlikda tayyorlandi
