my5
Sevimli

Buxoroda to`liq ta`mirlangan Olimpiya zaxiralari kolleji ochildi

Sport 21.01.2021, 19:56
Buxoroda to`liq ta`mirlangan Olimpiya zaxiralari kolleji ochildi

Bugun ko`hna va navqiron Buxoro shahrida investisiya dasturi asosida to`liq ta`mirdan chiqarilgan Olimpiya zaxiralari kollejining tantanali ochilish marosimi bo`lib o`tdi. Bu haqda Jismoniy tarbiya va sport vazirligining Matbuot xizmati xabar berdi.

Unda O`zbekiston Respublikasi Jismoniy tarbiya va sport vaziri Dilmurod Nabiev ishtirok etdi.

Marosimda Buxoro viloyatining chempion o`quvchilari, faxriy sportchilar, kollej jamoasi, Buxoro viloyat jismoniy tarbiya va sport boshqarmasi xodimlari hamda ommaviy axborot vositalari vakillari qatnashdi.

Tadbirda so`zga chiqqanlar ushbu maskan endilikda yoshlarning o`z iqtidor va imkoniyatlarini to`liq namoyon etishlari uchun keng imkoniyatlar taqdim etishini alohida ta`kidlab, buning uchun Hukumatimiz, qolaversa Jismoniy tarbiya va sport vazirligiga tashakkur izhor qilishdi.

Shundan so`ng vazir kollejning o`quv xonalari, kimyo, biologiya, informatika va laboratoriya xonalarini ko`zdan kechirib, ta`mirlanish va jihozlanish holati bilan tanishdi. Sport majmuasidagi taekvondo zalida sportchilar va ularning ota-onalari bilan suhbatlashib, yutuq va kamchiliklarga to`xtalib o`tdi.

Boks zalida O`zbekistonda xizmat ko`rsatgan murabbiy Ravshan Xodjaev bilan suhbatlashib, bo`lg`usi chempionlarning natijalari va kelgusidagi o`quv-yig`in mashg`ulotlari bilan qiziqdi.

Kollejning badiiy gimnastika zalida gimnastika gilami ta`mirtalab ahvolda ekanligini ko`rib, bu erga vazirlik nomidan yangi gimnastika gilami sovg`a qilindi. Sportchilar yangi gilam ustida o`z mashg`ulotlarini davom ettirishdi.

Shuningdek, D.Nabiev kollejning yangi qurilgan ochiq futbol, voleybol va stol tennisi maydonlarini ham ko`zdan kechirdi.

Tadbir so`ngida vazir o`quvchilar va ularning ota-onalari bilan esdalik uchun suratga tushdi.

Шарҳлар