Kecha, 20 yanvar kuni Hindistonning Serum instituti - dunyodagi eng yirik Covid-19 vaksinasini ishlab chiqaruvchi kompaniya yonib ketdi. Yong`in sabab kamida besh kishi halok bo`lgani taxmin qilinmoqda. Kompaniyaning ta`kidlashicha, alanga Covid-19 vaksinasini ishlab chiqarishga ta`sir qilmaydi.
Maharashtra shtatining janubidagi Pune shahri meri Murlidxar Moxolning aytishicha, o`t o`chiruvchilar tomonidan alanga o`chirilgandan so`ng vayronalar orasidan beshta jasad topilgan.
Maholning aytishicha, qurbonlar, qurilish ishchilari bo`lgan. Uning so`zlariga ko`ra, yong`in sababi aniqlanmagan va zarar miqdori hozircha aniq emas.
Hindistonning Serum instituti kompaniyasining bosh ijrochi direktori Adar Ponavallaning ta`kidlashicha, yong`in sabab vaksina ishlab chiqarishda hech qanday pasayish bo`lmaydi, chunki kompaniyada ishni davom ettirish uchun etarli imkoniyatlar mavjud.
Yong`in Covid-19 vaksinalarini ishlab chiqaradigan binolarga va 50 million dozadagi vaksina zaxirasiga zarar etkazmagan.
Suratlarda binodan katta tutun chiqayotgani va laboratoriya kostyumlaridagi o`nlab kompaniya ishchilari binoni tark etayotgani aks etgan.
Hindistonning Serum instituti dunyodagi eng yirik vaksinalar ishlab chiqaruvchisi hisoblanadi va AstraZeneca-Oksford universiteti bilan hamkorlikda vaksina ishlab chiqarish bo`yicha shartnoma imzolagan.
Kompaniyaning bosh ijrochi direktori Adar Ponavalla o`tgan oy Associated Press'ga bergan intervyusida 2021 yil oxiriga qadar ishlab chiqarish quvvatini yiliga 1,5 milliard dozadan 2,5 milliard dozaga etkazish rejalashtirilayotganini aytgandi.
