Xabaringiz bor, ayni kunlarda Jismoniy tarbiya va sport vaziri Dilmurod Nabiev Buxoro viloyatida bo`lib turibdi. Tashrif davomida vazir viloyatdagi sport inshootlarining holati, aholi orasida jismoniy tarbiya va sportni ommalashtirish darajasi, yangi sport bazalari va sport muassasalarida tarbiyalanayotgan yoshlarning sharoitlari bilan tanishdi. Bu haqda Vazirlik Axborot xizmati xabar qildi.
Jumladan, G`ijduvon tumanidagi Olimpiya va milliy sport turlari bo`yicha davlat ixtisoslashtirilgan maktab-internatida ham bo`ldi. Tashrif davomida D.Nabiyev maktab-internatda o`quvchilar uchun yaratilgan shart-sharoitlar va dars jarayonlari bilan yaqindan tanishdi. Shuningdek, maktab-internatda amalga oshiriladigan muhim rejalar haqida suhbatlashildi.
Kunning 2-yarmida esa professional futbol maktablari o`rtasidagi O`zbekiston kubogida munosib ishtirok etib, faxrli o`rinlarni egallagan maktab-internat o`quvchilari Jismoniy tarbiya va sport vaziri Dilmurod Nabiev tomonidan medal, diplom va sport formalari taqdim etildi. Bu rag`bat esa ertamiz egalarini yangi g`alabalar sari ruhlantirishiga aslo shubha yo`q.
Bundan tashqari, tadbirda "G`ijduvon PFK" xususiy futbol jamoasi rahbari Ma`murjon Otaqulov hududda futbolni rivojlantirishga qo`shgan hissasi, aholi orasida sog`lom turmush tarzini keng targ`ib etishdagi ulkan xizmatlari uchun "Jismoniy tarbiya va sport a`lochisi" ko`krak nishoni bilan taqdirlandi.
Ta`kidlash kerak, xususiy tadbirkor Ma`murjon Otaqulov tumanda futbol sport turini rivojlantirish maqsadida o`z hisobidan homiylik yordami ko`rsatib kelmoqda. Yangi mavsumda “G`ijduvon PFK” O`zbekiston 1-liga musobaqalarida qatnashishni maqsad qilgan.
