Issiqlik elektr stansiyasi qurilishi loyihasini boshlash marosimi O`zbekiston Energetika vazirligi, Investisiyalar va tashqi savdo vazirligi, shuningdek, “ACWA Power” kompaniyasining yuqori martabali vakillari ishtirokida bo`lib o`tdi.
Marosimda so`z olgan “ACWA Power” kompaniyasi boshqaruvi raisi Muhammad Abunayyan loyiha bo`yicha erishilgan natijalar bilan faxrlanib, quyidagilarni ta`kidladi:
“Sirdaryo IES qurilishiga start berilishi, ESK va O`zbekistonning past darajali uglevodorod chiqindili resurslardan foydalanishga o`tishida muhim omil sanaladigan Buxoro va Navoiy viloyatlaridagi “Bash” va “Jonkeldi” shamol elektr stansiyalari bo`yicha Investisiya kelishuvlarining imzolanishi bizning energetika tarmog`ini isloh qilish va mamlakatni ijtimoiy-iqtisodiy jihatdan rivojlantirilishini rag`batlantirish jarayonidan ilgarilab ketishga bo`lgan intilishimizni ifodalaydi. Bu shuningdek, iqtisodiyotni diversifikasiya qilish, Saudiya Arabistoni Qirolligi tashqarisida xorijiy investisiyalar hajmini maksimal darajada oshirish hisobiga biz Saudiya Arabistonining Nigoh – 2030 ga rioya qilishimizni tasdiqlaydi”.
Ma`lumot o`rnida, “ACWA Power” kompaniyasi elektr energiyasi va chuchuk suv ishlab chiqarish bo`yicha uskunalarni ishlab chiqish, moliyalashtirish va ekspluatasiya qilishga ixtisoslashgan. “ACWA Power” kompaniyasi 2004 yilda Ar-Riyod shahri (Saudiya Arabistoni)da ro`yxatga olingan va ta`sis etilgan bo`lib, undagi xodimlar soni qariyb 3 500 nafarni tashkil etadi. Xalqaro hamkorlik esa hozirgi kunda Yaqin Sharq, Afrika, Markaziy va Janubi-Sharqiy Osiyoning 12 ta mamlakatini qamrab olgan. “ACWA Power” kompaniyasi portfeli investisiya qiymati 61,2 milliard AQSh dollariga teng, sutkasiga kommunal xizmatlar va davlat-xususiy hamkorligi modellari autsorsingi asosidagi uzoq muddatli ofteyker shartnomalari doirasida davlat kommunal va sanoat korxonalari ehtiyojlarini qondirish uchun ulgurji etkazib berilayotgan 38,7 GVt elektr energiyasi va 5,8 million m3 chuchuk suv ishlab chiqaradigan 60 ta aktivni o`z ichiga oladi.
Umumiy qiymati 1,2 milliard dollar bo`lgan mazkur loyihaning foydali ish koeffisienti qariyb 60 foizni tashkil etadi.
Bu esa boshqa elektr stansiyalari bilan taqqoslaganda hozirgi vaqtda elektr energiyasi ishlab chiqarish uchun iste`mol qilinayotgan tabiiy gaz miqdorini deyarli ikki barobar iqtisod qilish imkonini beradi.
Loyiha real vaqt rejimida havo izolyasiyasiga ega ochiq taqsimlash qurilmasi orqali O`zbekistonning milliy energiya tizimiga uzluksiz elektr energiyasi uzatish va kunu-tun elektr energiyasi ishlab chiqarish jarayonini boshqarish uchun dunyo ekspertlari tomonidan loyihalashtirilgan eng zamonaviy konstruksion echimlar, ekspluatasiya va nazorat vositalaridan foydalanishni ko`zda tutadi.
