Andijon viloyati tumanlaridan birining Sanitariya epidemiologik osoyishtalik va jamoat salomatligi xizmati boshlig`i mahalliy fermer xo`jaligiga qarashli mevali bog`dan iborat 1 gektar er maydonidan ijara shartnomasi asosida foydalanib kelgan. U mazkur er maydonini tasarruf etish va uchinchi shaxsga o`tkazish huquqiga ega bo`lmasada, 45 ming AQSh dollariga sotib, noqonuniy daromad orttirishni rejalashtirgan.
Davlat xavfsizlik xizmati Andijon viloyati boshqarmasi xodimlarining Bosh prokuratura huzuridagi Departamentning hududiy boshqarmasi bilan hamkorlikda o`tkazgan tezkor tadbiri davomida mazkur mansabdor shaxs xaridordan so`ralgan pulni olgan vaqtida ashyoviy dalillar bilan ushlandi.
DXX va Departamentining Toshkent viloyati boshqarmalari tomonidan o`tkazilgan tezkor tadbirda, xususiy tadbirkor Qibray tumanining “Tuzel” mavzesida joylashgan 2 gektar erni xaridorga 1 mln. AQSh dollariga sotishga kelishib, shundan 10 ming dollarini olgan vaqtida ushlandi.
Tergovoldi surishtiruv harakatlari davomida, mazkur shaxs muntazam ravishda noqonuniy er sotish bilan shug`ullanib kelganligi va undan ko`pchilik jabr ko`rganligi ma`lum bo`ldi.
Navoiy shahrida joylashgan «Navoiy savdo» AJ rahbari mazkur jamiyatga tegishli 1 gektar er maydonini aksiyadorlarni xabardor qilmasdan, noqonuniy tarzda 29.700 AQSh dollariga sotmoqchi bo`ladi.
U so`ralgan puldan 50 mln. so`m hamda 1.500 AQSh dollarini avans sifatida olgan vaqtida DXX Navoiy viloyati boshqarmasi va Departamentning Navoiy shahar bo`limi xodimlari tomonidan ushlandi.
O`zbek davlat er tuzish ilmiy-loyihalash institutining Andijon viloyat filiali xodimi sholikorlik bilan shug`ullanish uchun Qo`rg`ontepa tumani xokimligi zaxirasidan 8 gektar erni yuqori lavozimlarda ishlovchi tanishlari orqali ajratib, tegishli hujjatlarni rasmiylashtirib berish evaziga fuqarodan 10 ming 400 AQSh dollari talab qiladi.
U so`ralgan puldan 1000 AQSh dollarini olgan vaqtida DXX hamda Departament xodimlari tomonidan ushlandi.
Hozirda ushbu shaxslarga nisbatan Jinoyat Kodeksining tegishli moddalari bilan jinoyat ishlari qo`zg`atilib, tergov harakatlari doirasida mazkur noqonuniy holatlarga aloqador bo`lgan boshqa shaxslarni aniqlash bo`yicha ham zarur chora-tadbirlar ko`rilmoqda.
