my5
Sevimli

“O`zbekneftgaz” Boshqaruv raisi hamrohligida jurnalist va blogerlar “GTL Uzbekneftegaz” zavodidagi qurilish-montaj ishlari bilan tanishishdi

Iqtisodiyot 11.07.2021, 10:11
“O`zbekneftgaz” Boshqaruv raisi hamrohligida jurnalist va blogerlar “GTL Uzbekneftegaz” zavodidagi qurilish-montaj ishlari bilan tanishishdi

“O`zbekneftgaz” AJ Boshqaruvi raisi Mehriddin Abdullaev boshchiligidagi “Ishchi guruh” a`zolari, jurnalist va blogerlar Qashqadaryo viloyatining G`uzor tumanida qurilish ishlari davom ettirilayotgan “GTL Uzbekneftegaz” zavodida bo`ldilar.

Deputat Rasul Kusherbaev, jurnalist Xurshid Daliev, Bahodir Ahmedov, blogerlar – Nurbek Alimov, Otabek Ortiqov, Umid Karimov zavodda bugungi kunda amalga oshirilayotgan qurilish ishlarining so`nggi bosqichi bilan yaqindan tanishdilar.

Boshqaruv raisi tashrif buyurganlarga qurilish va montaj ishlari holati, “Uzbekneftegaz GTL” zavodida mash`ala qurilmasi ishga tushirilgani borasidagi fikrlari bilan o`rtoqlashishdi.

“Ishchi guruh” a`zolari, jurnalist va blogerlar zavodda amalga oshirilayotgan qurilish jarayonini ko`zdan kechirish maqsadida, qurilish maydonida bo`lib, amalga oshirilayotgan ishlarni guvohiga aylanishdi.

Shundan so`ng, “Uzbekneftegaz GTL” zavodining laboratoriyasida 100 dan ortiq zamonaviy yuqori texnologiyali uskunalar va uning ishlash tizimi bo`yicha zavod direktori Fahriddin Abdurasulov tushunchalar berdi.

Ushbu uskunalar olingan natijalarning aniqligini oshirish, inson omilini bartaraf etish va mehnat unumdorligini oshirish imkonini berishi, laboratoriyada kuniga jami 4 000 gacha tahlil bajarish mumkinligi bo`yicha batafsil axborot berildi.

“GTL” zavodi laboratoriyasining o`ziga xosligi turli xil qo`llash segmentlari, jumladan, gazni qayta ishlash, gaz kimyosi, shuningdek, neftni qayta ishlash va neft kimyosi uchun ko`plab tadqiqot usullarini qo`llashdan iborat.

Boshqaruv raisi laboratoriyada ish faoliyatini davom ettirayotgan yosh mutaxassislar bilan suhbatda bo`lib, ularning ingliz tili va texnologiyalar bo`yicha bilimlarini sinovdan o`tkazdi.

Suhbat asnosida ularning texnologiyalarni ishlatishi, har bir harakatni bajarish holatlari o`rganildi.

Yosh mutaxassislar o`z navbatida, laboratoriya xodimlari zamonaviy sinov usullari, jumladan, “ASTM International” xalqaro standartlariga muvofiq sinovlarni o`tkazish usullarini o`zlashtirganliklarini ma`lum qilishdi.

Boshqaruv raisi hozirgi kunda “GTL” zavodi Markaziy laboratoriyasining milliy va xalqaro akkreditasiyasiga tayyorgarlik ishlari faol olib borilayotganini ma`lum qildi.

Tashrif davomida investisiya loyihasining amalga oshirilishi, qurilish-montaj ishlarini yakunlash holati, tashqi infratuzilma ob`ektlari qurilishining olib borilishi, shuningdek, “Uzbekneftegaz GTL” korxonasining ishga tushirish-sozlash oldi va ishga tushirish-sozlash ishlarining amalga oshirilish jarayonlari o`rganildi.

Bugungi kunga kelib, korxonaning qurilish maydonida asosiy qurilish-montaj ishlari yakunlanib, ishga tushirish-sozlash oldi va ishga tushirish-sozlash ishlari bosqichma-bosqich faol sur`atlarda olib borilmoqda.

Ushbu yirik loyiha o`zining yakuniy bosqichiga etib keldi. Umumiy ishlar ko`lamining 96 foizdan ortig`i bajarildi. Zavodning qurilish maydonida qurilish-montaj ishlari yakunlanib, obodonlashtirish ishlari faol sur`atlarda amalga oshirilmoqda.

Ishga tushirish-sozlash oldi va ishga tushirish-sozlash ishlarini bajarishda hozirgi kunda 500 dan ziyod texnika jalb etilgan bo`lib, qurilish maydonida 9 mingdan ortiq kishi mehnat faoliyatini davom ettirmoqda.

Shuningdek, zavodning ma`muriy binosi qurilish ishlarining borishi o`rganildi va bu erda ishchi-xodimlarning ishlashlari uchun zamonaviy texnologiyalar o`rnatilishi va shunga qarab qurilishni davom ettirilishi kerakligi ta`kidlandi.

Eslatib o`tamiz, “Uzbekneftegaz GTL” zavodi 2021 yilning uchinchi choragidan boshlab yuqori sifatli sintetik yoqilg`i mahsulotlari ishlab chiqarishi, import o`rnini bosish maqsadida, Respublikamizning ichki bozoriga va mamlakatning eksport salohiyatini oshirish maqsadida tashqi bozorlarga etkazib berishni boshlashi ko`zda tutilgan.

Zavod ishga tushishi bilan, boshqa mahsulotlar qatorida sintetik kerosin mahsuloti ishlab chiqarilishi boshlanadi. Hozirgi kunda ushbu yoqilg`i neft xomashyosi negizida olingan “Jet A-1” aviakerosini bilan 50 foizgacha bo`lgan proporsiyadagi aralashmasi fuqarolik aviasiyasida qo`llanilishiga ruxsat berilgan.

“Uzbekneftegaz GTL” zavodi ishga tushgach, yiliga 3,6 milliard kub metr tozalangan tabiiy gaz (metan) qayta ishlanadi va 1,5 million tonna yuqori sifatli sintetik suyuq yoqilg`i, jumladan, 307 ming tonnadan ortiq aviakerosin, 724 ming tonna dizel yoqilg`isi, 437 ming tonna neft, kimyo sohasi uchun xomashyo bo`lgan nafta, 53 ming tonna suyultirilgan gaz ishlab chiqarilishiga erishiladi.

Шарҳлар