my5
Sevimli

Shavkat Mirziyoev bir qator xorijiy mamlakatlarning yurtimizga yangi tayinlangan elchilaridan ishonch yorliqlarini qabul qilib oldi

Siyosat 25.08.2021, 18:10
Теглар: Shavkat Mirziyoev
Shavkat Mirziyoev bir qator xorijiy mamlakatlarning yurtimizga yangi tayinlangan elchilaridan ishonch yorliqlarini qabul qilib oldi

25 avgust kuni xorijiy davlatlarning mamlakatimizga yangi tayinlangan elchilari tomonidan ishonch yorliqlarini topshirish marosimi bo`lib o`tdi.

O`zbekiston Respublikasi Prezidenti Shavkat Mirziyoev Ruminiya elchisi Daniel Kristian Chobanu, Polsha Respublikasi elchisi Radoslav Gruk, Tojikiston Respublikasi elchisi Abdujabbor Rahmonzoda, Shveysariya Konfederasiyasi elchisi Konstantin Obolenskiy va Germaniya Federativ Respublikasi elchisi Tilo Klinnerdan ishonch yorliqlarini qabul qilib oldi.

Davlatimiz rahbari yangi tayinlangan elchilarni Yangi O`zbekistonni barpo etish yo`lidagi keng miqyosli demokratik yangilanishlar va ijtimoiy-iqtisodiy islohotlar davom etayotgan muhim tarixiy davrda mamlakatimizda diplomatik missiyasini boshlagani bilan samimiy tabrikladi.

Amalga oshirilayotgan ochiq va pragmatik tashqi siyosatning ustuvor yo`nalishlari to`g`risida so`z yuritar ekan, Prezidentimiz xorijiy hamkor mamlakatlar, avvalo, qo`shni davlatlar bilan do`stona munosabatlar va ko`p qirrali hamkorlikni rivojlantirishga katta e`tibor qaratilayotganini alohida qayd etdi.

Joriy yil avgust oyining boshida Turkmanistonda Markaziy Osiyo davlatlari rahbarlarining navbatdagi Maslahat uchrashuvi muvaffaqiyatli o`tkazilgani, ushbu tadbir yaqin mintaqaviy hamkorlikning kun tartibi keng ekanligini yana bir bor namoyish etgani mamnuniyat bilan qayd etildi.

O`zbekiston etakchisi Afg`onistondagi vaziyat rivoji bilan bog`liq masalalarga alohida e`tibor qaratdi. Bugun ushbu mamlakatda ro`y berayotgan voqealar butun xalqaro hamjamiyatda tashvish uyg`otayotgani ta`kidlandi.

O`zbekiston afg`on inqirozini tez fursatda tartibga solishga ko`maklashish uchun muhim tashabbuslarni ilgari surayotgani va zarur sa`y-harakatlarni amalga oshirayotgani qayd etildi.

Jumladan, joriy yilning 15-16 iyun kunlari Toshkent shahrida o`tkazilgan “Markaziy va Janubiy Osiyo: mintaqaviy bog`liqlik. Tahdidlar va imkoniyatlar” mavzusidagi yuqori darajadagi xalqaro konferensiyaning maqsadi Afg`onistonda uzoq muddatli tinchlik o`rnatilishi va iqtisodiy tiklanishga ko`maklashadigan yirik infratuzilmaviy loyihalarni amalga oshirish uchun sharoitlarni shakllantirishdan iborat bo`ldi.

O`zbekiston Prezidenti mamlakatimizning yangi elchilar vakillik qilayotgan davlatlar bilan o`zaro manfaatli hamkorligining istiqbollariga alohida to`xtalib o`tdi.

Ruminiya bilan ikki tomonlama amaliy hamkorlikni rivojlantirish uchun keng imkoniyatlar mavjudligi qayd etildi. Bu, avvalo, o`zaro savdo hajmini oshirish, to`qimachilik, kimyo va farmasevtika tarmoqlari, qishloq xo`jaligi, transport va logistika sohalarida kooperasiyani yo`lga qo`yishdir.

Shu munosabat bilan qo`shma Hukumatlararo komissiyaning birinchi yig`ilishini o`tkazish, muloqot va almashinuvlarni, shu jumladan tashqi siyosiy idoralar darajasida faollashtirish taklif etildi.

Xalqaro tashkilotlar va Evropa Ittifoqi bilan muloqot doirasida Ruminiya bilan hamkorlik qilishga ham muhim e`tibor qaratilmoqda.

Polsha O`zbekistonning Evropadagi ishonchli an`anaviy hamkoridir. Keyingi yillarda ko`p qirrali O`zbekiston-Polsha hamkorligi izchil rivojlanib borayotgani mamnuniyat bilan qayd etildi. Bundan tashqari, EI bilan ko`p tomonlama muloqot va Vishegrad guruhi doirasidagi hamkorlik mustahkamlanib bormoqda.

Shu bilan bir qatorda, ikki mamlakat qishloq xo`jaligi, mashinasozlik, kichik biznes va innovasiyalar, ta`lim va turizm kabi sohalarda hali ishga solinmagan katta salohiyatga ega.

O`zbekiston etakchisi bo`lajak oliy darajadagi muloqotlar amaliy sheriklikni kengaytirishga qo`shimcha sur`at bag`ishlashini ta`kidladi.

Davlatimiz rahbari O`zbekiston-Tojikiston do`stlik, yaxshi qo`shnichilik va strategik sheriklik munosabatlarida sezilarli yuksalishga erishilganini mamnuniyat bilan qayd etildi.

Bunga ikki birodar mamlakat etakchilarining muntazam uchrashuvlari va siyosiy irodasi xizmat qilmoqda.

O`zbekiston Respublikasi Prezidenti joriy yil iyun oyida Tojikiston Respublikasiga amalga oshirgan tarixiy tashrifi yakunida erishilgan kelishuvlar va aniq kooperasiya loyihalarini to`liq hajmla amalga oshirish muhim ekani alohida ta`kidlandi.

Bundan tashqari, mamlakatlarimiz xalqaro va mintaqaviy tashkilotlar doirasida yaqindan hamkorlik qilib, bir birini qo`llab-quvvatlab kelmoqda.

Shveysariya bilan munosabatlar istiqboliga to`xtalar ekan, O`zbekiston Prezidenti siyosiy muloqotni yanada rviojlantirish va birgalikdagi iqtisodiy loyihalarni ilgari surish muhim ekanini ta`kidladi.

Bank-moliya sohasi, innovasiyalar va zamonaviy texnologiyalar, oziq-ovqat sanoati, farmasevtika, Orolbo`yidagi vaziyatni yaxshilash uchun moliyaviy-texnik ko`mak dasturlarini kengaytirish ustuvor yo`nalishlar sifatida belgilandi.

Qo`shma Hukumatlararo komissiya faoliyati doirasidagi amaliy sheriklikning yangi kun tartibini ishlab chiqish muhim ekani qayd etildi.

O`zbekiston Germaniya bilan keng ko`lamli hamkorlikni rivojlantirish va strategik sheriklikni mustahkamlashdan manfaatdor.

Davlatimiz rahbari ta`kidlaganidek, oliy darajadagi muntazam muloqotlar O`zbekiston-Germaniya munosabatlarida yangi bosqich boshlanganidan dalolat beradi.

Global iqtisodiy inqiroz oqibatlariga qaramay, o`zaro savdo hajmi, Germaniyaning etakchi kompaniyalari ishtirokidagi qo`shma kooperasiya loyihalari soni ortmoqda.

Bundan tashqari, respublikamizda “KfW” banki, Germaniya savdo-sanoat palatalari uyushmasi hamda Kichik va o`rta biznes birlashmasi ofislari o`z faoliyatini muvaffaqiyatli boshlagani qayd etildi.

Ishbilarmonlar o`rtasidagi aloqalarning faollashishi ikki tomonlama iqtisodiy hamkorlikning ulkan salohiyatini ro`yobga chiqarishga xizmat qilishi ta`kidlandi.

O`zbekiston Respublikasi Prezidenti so`zini yakunlar ekan, diplomatik vakolatxonalar rahbarlariga ularning O`zbekiston Respublikasi bilan do`stlik va ko`p qirrali hamkorlikni mustahkamlash yo`lidagi mas`uliyatli va sharafli faoliyatiga katta muvaffaqiyatlar tiladi.

Qisqa suhbatda diplomatlar samimiy qabul va mamlakatimizda samarali faoliyat uchun yaratilgan sharoitlar uchun minnatdorlik bildirdilar. Elchilar mamlakatlarimiz o`rtasidagi sheriklik aloqalarini har tomonlama rivojlantirish uchun bor kuch-g`ayratini safarbar qilishini qayd etdilar.

Шарҳлар

Prezident IHT a`zosi bo`lgan Afg`onistondagi murakkab vaziyatga to`xtaldi

28.11.2021, 15:52

Avval xabar berganimizdek, davlatimiz rahbari IHTda nutq so`zladi. Unda Prezident IHT a`zosi Afg`onistondagi bugungi vaziyatga ham alohida to`xtalib o`tdi. Bu haqda Prezident Matbuot xizmati xabar...
Prezident Ashxobod shahrida o`tayotgan Iqtisodiy hamkorlik tashkilotining 15-sammitida nutq so`zladi

28.11.2021, 15:04

Prezident Shavkat Mirziyoev Ashxobod shahrida o`tayotgan Iqtisodiy hamkorlik tashkilotining 15-sammitida nutq so`zlamoqda. Bu haqda Prezident Matbuot xizmati xabar berdi.Davlatimiz rahbari Prezident Gurbanguli Berdimuhamedovga anjumanni yuksak...
O`zbekiston va Tojikiston Prezidentlari sheriklikni kengaytirish masalalarini muhokama qilishdi

28.11.2021, 13:57

O`zbekiston Respublikasi Prezidenti Shavkat Mirziyoev bugun Ashxobod shahrida o`tayotgan Iqtisodiy hamkorlik tashkiloti sammiti doirasida Tojikiston Respublikasi Prezidenti Emomali Rahmon bilan uchrashuv o`tkazdi. Bu haqda Prezident...
Shavkat Mirziyoev Pokiston Bosh vaziri bilan telefon orqali muloqot qildi

25.11.2021, 23:20

O`zbekiston Respublikasi Prezidenti Shavkat Mirziyoev 25 noyabr kuni Pokiston Islom Respublikasi Bosh vaziri Imron Xon bilan telefon orqali muloqot qildi. Bu haqda Prezident Matbuot xizmati...