my5
Sevimli

Shavkat Mirziyoev Oliy Evroosiyo iqtisodiy kengashi yig`ilishida ishtirok etdi

Siyosat 14.10.2021, 20:25
Shavkat Mirziyoev Oliy Evroosiyo iqtisodiy kengashi yig`ilishida ishtirok etdi

O`zbekiston Respublikasi Prezidenti Shavkat Mirziyoev bugun, 14 oktyabr kuni Oliy Evroosiyo iqtisodiy kengashining videoanjuman shaklidagi navbatdan tashqari yig`ilishida ishtirok etdi. Bu haqda Prezident Matbuot xizmati ma`lum qildi.

Tadbir O`zbekiston 2020 yil dekabr oyida Evroosiyo iqtisodiy ittifoqi huzuridagi kuzatuvchi davlat maqomini olganidan buyon ushbu integrasiyaviy birlashmaning davlatimiz rahbari ishtirokida o`tgan uchinchi sammiti bo`ldi.

Qozog`iston Respublikasi Prezidenti Qasim-Jomart Toqaev raisligida o`tgan sammitda Armaniston Respublikasi Bosh vaziri Nikol Pashinyan, Belarus Respublikasi Prezidenti Aleksandr Lukashenko, Rossiya Federasiyasi Prezidenti Vladimir Putin, Qirg`iz Respublikasi Prezidenti Sadir Japarov, EOII huzuridagi kuzatuvchi mamlakat - Kuba Respublikasi Prezidenti Migel Bermudes va Evroosiyo iqtisodiy komissiyasi Hay`ati raisi Mixail Myasnikovich qatnashdi.

Yig`ilish kun tartibidan ko`p tomonlama iqtisodiy sheriklikni yanada mustahkamlash, shuningdek, savdo, sanoat kooperasiyasi, transport-tranzit salohiyatini rivojlantirish, oziq-ovqat xavfsizligi, raqamlashtirish, “yashil” iqtisodiyot va boshqa ustuvor yo`nalishlar bo`yicha amaliy hamkorlikni ilgari surish masalalari o`rin oldi.

Davlat rahbari o`z nutqida O`zbekistonning tabiiy savdo va iqtisodiy hamkorlari – EOII mamlakatlari bilan o`zaro manfaatli hamkorlikni rivojlantirishning ustuvor yo`nalishlarini belgilab berdi.

Xususan, pandemiya sharoitlarida mamlakatimizning Tashkilotga a`zo davlatlar bilan tovar ayirboshlash hajmi barqaror ortib borayotgani ta`kidlandi. Evroosiyo iqtisodiy komissiyasi bilan faol hamkorlik yo`lga qo`yildi, qo`shma Ishchi guruh o`z faoliyatini boshladi. Bundan tashqari, Eroosiyo taraqqiyot banki bilan hamkorlik bo`yicha istiqbolli loyihalar tayyorlanmoqda.

Savdo-iqtisodiy aloqalarni yo`lga qo`yish borasidagi sa`y-harakatlarni faollashtirish muhim ekanini alohida qayd etib, O`zbekiston etakchisi o`zaro savdoda mavjud to`siqlarni bartaraf etish, texnik reglament va standartlarni uyg`unlashtirish, bojxona tartibotlarni raqamlashtirish bo`yicha qo`shma “yo`l xarita”sini ishlab chiqish taklifini ilgari surdi. 

O`zbekiston sanoat kooperasiyasini chuqurlashtirish orqali mintaqalararo qo`shilgan qiymat zanjirlarini yaratishda hamkorlikni kengaytirishdan manfaatdor ekani qayd etildi. Toshkent shahrida har yili “Innoprom – Markaziy Osiyo” sanoat forumining o`tkazilishi buning uchun yangi imkoniyatlar ochadi.

Prezidentimiz milliy iqtisodiyotlarning barqaror rivojlanishida muhim omil sifatida transport yo`laklari tarmog`i va logistika infratuzilmasini takomillashtirish muhim ekaniga e`tibor qaratdi.

Davlatimiz rahbari O`zbekiston tomonidan Rossiya va Qozog`iston bilan birgalikda yo`lga qo`yilayotgan zarur tovarlarni tez fursatda o`zaro etkazib berish bo`yicha “Agroekspress” loyihasiga qo`shilishga taklif etdi.

Oziq-ovqat xavfsizligini ta`minlash masalalarining alohida dolzarb ahamiyatini hisob olib, O`zbekiston Prezidenti bu boradagi sa`y-harakatlarni birlashtirish va qo`shma hamkorlik dasturini ishlab chiqish orqali sohadagi hamkorlikning yangi nuqtalarini izlash muhim ekanini ta`kidladi.

Mamlakatimiz EOII doirasidagi raqamli transformasiya jarayonlarida ishtirok etish, amaliy tajriba almashish va ilg`or texnologiyalarning o`zaro transferidan manfaatdor ekani qayd etildi.

Davlatimiz rahbari ekologiya masalalariga alohida e`tibor qaratib, iqlim o`zgarishi oqibatlarini yumshatish bo`yicha o`zaro muvofiqlashgan choralar zarur ekanini ta`kidladi.

O`zbekiston Prezidenti hamkor mamlakatlarni Orolbo`yida ekologik innovasiyalar va texnologiyalar hududini yaratish bo`yicha qo`shma loyihalarda faol ishtirok etishga chaqirdi hamda kelgusi yil sentyabr oyida Nukus shahrida o`tkaziladigan “Yashil” energetika bo`yicha xalqaro forumga taklif etdi.

Bundan tashqari, birlashma doirasida yaratilgan Iqlim masalalari bo`yicha yuqori darajadagi ishchi guruh bilan hamkorlikni yo`lga qo`yish tashabbusi ilgari surildi.

O`zbekiston etakchisi so`zining yakunida sammit yakunlari EOII mamlakatlari bilan o`zaro manfaatli hamkorlik va yaqin sheriklikni ilgari surishga xizmat qilishiga ishonch bildirdi.

Шарҳлар