Biroz avval O`zbekiston xalqaro san`at forumiga mezbonlik qilishi haqida xabar bergan edik. Bugun O`zbek milliy akademik drama teatrida mazkur IV “Yoshlar teatr san`ati” forumining tantanali ochilish marosimi bo`lib o`tdi. Unda MDH, Boltiqbo`yi va Gruziya davlatlaridan kelgan mehmonlar ishtirok etishdi.
Forumni Qozog`iston Respublikasidan kelgan teatr aktyorlari ijrosidagi spektakl ochib berdi. Ta`kidlash joizki, mazkur forumning maqsadi xalqaro aloqalarni rivojlantirish, yosh rejissyorlar, aktyorlar, rassomlar, teatrshunoslar ijodini namoyish etish va ijodiy tajriba almashishdir.
“Quvonarlisi, ushbu forumda ishtirok etayotgan o`zbekistonlik teatr ijodkorlarining barchasi yoshlardir. Eng muhimi, ular xorijlik hamkasblari bilan o`zaro tajriba almashishga tayyor. O`ylaymizki, mazkur forum turli millat vakillarining o`zaro tajriba almashish maydoniga aylanib, yosh ijodkorlar uchun katta imkoniyatlar eshigini ochadi. Shuningdek, teatr sohasidagi istiqbolli hamkorliklarga zamin hozirlaydi”, deyiladi Madaniyat vaziri Ozodbek Nazarbekovning rasmiy sahifasida.
