Toshkent shahrining barcha tumanlaridagi pasport bo`limlari fuqarolarga biometrik pasportlar berishni vaqtincha to`xtatdi. Bu haqda Ichki ishlar vazirligi matbuot xizmatiga tayanib, «Novosti Uzbekistana» xabar berdi.

Vazirlik matbuot xizmati vakili Zikirillo Ne`matovning aniqlik kiritishicha, bir oy davomida biopasportlarni tayyorlovchi qurilmalarga texnik xizmat ko`rsatiladi va profilaktikadan o`tkaziladi. Profilaktika ishlari bir vaqtning o`zida shaharning barcha pasport bo`limlarida olib boriladi va 11 dekabr kuni yakuniga etadi, deb yozadi “Daryo.uz” nashri.

Fuqarolar shaxsni tasdiqlovchi hujjatlarni tayyorlash masalasida 12 dekabr, dushanba kunidan boshlab tuman pasport stollariga murojaat qilishi mumkin.