Yozda tayyoralanadigan turli murabbolar sovuq mavsumda tanga rohat beribgina qolmay, shifobaxsh xususiyatlari bilan ham quvontiradi.

Malina

Bu mevadan tayyorlanadigan murabbo va sharbatlar shamollash, tumov, angina, ich ketishi, qorin sohasidagi og`riqlarda foydali. Malina sharbatini ovqatdan so`ng qabul qilish organizmni foydali moddalar bilan to`yintirib, immunitetni oshiradi.

Mumkin emas: allergik toshmalarga moyilligi borlarga, oshqozon yarasi xuruj qilganda, jigar faoliyati buzilishlarida.

Qorag`at (smorodina)

Qorag`at murabbosi, djemi va kompoti surunkali shamollash, gastrit, holsizlikda foydali, bolalarning immunitetini oshiradi, kattalarga quvvat beradi, peshob haydovchi vosita sifatida foydalaniladi. Bronxit, laringit va yo`talda qorag`at sharbatini asal bilan aralashtirib qabul qilish tavsiya etiladi.

Mumkin emas: oshqozon yarasi, o`tkir gastritda.

Chakanda (oblepixa)

Immunitetni oshiradi, kamqonlik, qorin va ichaklardagi muammolarni bartaraf etadi, shamollashga qarshi profilaktika vositasi. Tish va milklarni mustahkamlash, og`iz bo`shlig`idagi shamollash holatlarida ham chakanda murabbosidan tayyorlanagan choy va damlamalar foydali.

Mumkin emas: o`tkir xolesistitda va kichik yoshdagi bolalarga.