Uning muxlislari ko`p, san`atda ham o`z yo`nalishini topgan. Har oyda bitta qo`shiq premera qilmasada, muxlislari tilida u — Shohrux repper. Hamma uni aynan rep yo`nalishida kuylagani uchun taniydi. Shohrux tez-tez intervyu bermasa-da, ijtimoiy saytlardagi shaxsiy sahifasida, o`zi bilan bog`liq barcha ma`lumotlarni yozib turishni kanda qilmaydi. Bugun muxlislarning talab va takliflarni inobatga olgan holda u bilan uchrashdik. Samimiy suhbat jarayonida esa uzoq kutilgan yakkaxon konserti, oilasi va kelajakdagi rejalari haqida bilib oldik.
Ijod
— Muxlislaringiz uzoq kutgan konsert kunlari ma`lum bo`ldi. Tayyorgarlik qanday ketyapti?
— Konsert repertuari anchadan buyon tayyorlanib, qo`shiqlar yozilib qo`yilgan. Ayni kunlarda ssenariy bilan bandman lekin u haqda batafsil gapira olmayman. Biroq tomoshabinlarning ko`ngliga ma`qul keladigan qo`shiqlar, duetlar bo`lishi kutilyapti.
— Shu kungacha konsertlaringiz jonli ijroda o`tardi. Bu gal fonogrammadan foydalanyapsiz. Nega?
— Aslida bu yilgi konsertda ham jonli ijroda kuylayman. Bannerlardagi "Fonogrammadan foydalaniladi" degan yozuvga kelsak, buning o`ziga yarasha sababi bor. Ya`ni qonun bo`yicha konsert dasturidagi musiqalarning bittasi bo`lsa-da, kompyuterda ishlansa, u fonogramma hisoblanadi va bannerda ham yoziladi. Lekin qo`shiqlarni yuz foiz jonli ijroda kuylamoqchiman.
— Siz kuylaydigan yo`nalish o`zbek estradasida yangilik bo`ldi. O`sha paytdagi muxlislaringiz bugungacha saqlanib qolganiga ishonasizmi?
— Ha, albatta! Chunki inson yoshligidagi narsalarni hech qachon yoddan chiqarmaydi. Ayniqsa, yoshligi bilan bog`liq musiqani. Shunday ekan, o`ylaymanki, qo`shiqlarimning o`z tinglovchilari bor va uni kelajakda ham eshitib yurishadi.
— Baribir rep yo`nalishi bizda uncha rivojlanib ketmadi. Buning sababi nimada deb o`ylaysiz?
— Sababi, rep yo`nalishining o`ziga yarasha qiyin tomonlari ko`p. Nokamtarlik qilmoqchi emasmanu, biroq hamma xonanda ham uni ijro etolmaydi. Shunday bo`lsa ham, rep o`qish yoshlar orasida yaxshi rivojlangan. Buni menga bo`lgan murojaatlardan bilaman. Ko`pchilik o`zini sinab ko`rayapti.
— Boshqa yo`nalishda kuylashingizni tasavvur qilish qiyin. Chunki sizga reper “tamg`a”si qo`yilgan. Agar yaxshi taklif tushsa, boshqa yo`nalishlarda ham kuylashingiz mumkinmi?
— Bu men uchun hech qanday muammo tug`dirmaydi. Agar ijodkorlardan yaxshi taklif tushsa, o`ylab ko`rishim mumkin. Istalgan janrda kuylay olishimga ishonaman.
— Musiqiy telekanallarda Shahzoda bilan kuylagan duetingizga ko`zimiz tushdi, u erda qo`shiqning siz ijro etgan joyi kesib tashlangan. Sababi nimada deb o`ylaysiz?
— Shahzoda bilan birga kuylagan “Ket” qo`shig`imiz tinglovchilar tomonidan yaxshi kutib olindi. Ammo savolingizga aniq javob bera olmayman, chunki negaligini o`zim ham bilmayman. Yaxshisi, bu savol bilan o`sha telekanal ijodkorlariga murojaat qilish kerak.
Farzandlar
— Keling, endi farzandlaringiz haqida gaplashsak... O`tgan yili ikkinchi bor ota bo`ldingiz...
— Islom o`g`lim tug`ilganda ota bo`lganimdan xursand bo`lib quvonchdan ettinchi osonda uchgandim. Lekin qiz bolaga ota bo`lish boshqacha ekan. Ko`nglimdan kechgan shirin tuyg`ularimni so`z bilan izohlab berolmayman. Qizim Leyla haqida to`lib-toshib gapirgim keladi. U har kuni o`zgarib, har soatda yangi qiliqlari bilan bizni xursand etayapti.
— O`g`lingiz yangi mehmonni qanday qabul qildi? Ota-onasini "rashk" qilmadimi?
— Islom endigina ikki yoshda. Hali ko`p narsani tushunmaydi. Shuning uchun bo`lsa kerak, juda "rashkchi". Agar Leyla bilan ko`proq ovora bo`lib qolsak, kattalarning e`tiborini o`ziga tortishga harakat qiladi. Lekin shunday bo`lsa ham, aka ekanini sezadi deb o`ylayman. Vaqti-vaqti bilan singlisining yoniga kelib, uni o`pib, quchoqlab ketadi.
— Islomning instagramda o`zingiz yurgizadigan shaxsiy profili bor. Qizingizning suratlarini ham ijtimoiy tarmoqqa qo`yganmisiz?
— Yo`q. Leyla uchun instagramda sahifa ochmayman. Sababi, qiz bola iloji boricha begona ko`zlardan uzoqroqda turgani yaxshi.
— O`g`lingiz qo`shiqlaringizni tinglaydimi? Kliplaringizni ko`rganda qanday holatga tushadi?
— U hali kichkina. Shu sabab undan biror bir baho kutmayman. Faqat televizorda ko`rganda “dada”, deb qo`yadi, xolos.
— U bilan ko`p vaqt o`tkazishingizni bilamiz. Ko`proq nimalar bilan shug`ullanasizlar?
— Bo`sh vaqtim bo`ldi deguncha, farzandlarim bilan gaplashishga harakat qilaman. Chunki ish hech qachon tugamaydi. Bolalarimning bolaligi esa ko`z oldimdan kinotasmadek o`tib ketishini istamayman. Ular bilan birga zavqlanaman, o`yinlarida birga bolaga aylanib o`ynayman. Qiziqishlarining har birini e`tibor bilan kuzataman. Kelajakda ham ularning har bir fikriga hurmat bilan munosabatda bo`lishni niyat qilganman.
Qiziqishlar
— Shohrux, hayotingizning qaysi davriga qaytib qolishni istardingiz?
— Inson o`tgan kunini unutmasligi kerak. Ammo men kelajakka qarab intiladigan insonman. Ayni vaqtdagi holatimdan mamnun bo`lganim uchun ham o`tgan kunimga qaytishni istamasdim.
— O`zingiz tomosha qilgan qaysi filmni boshqalarga ham tavsiya qilasiz?
— Mashhur aktyor Uill Smit bosh rolni ijro etgan "Baxt ortidan quvib" filmini tavsiya etaman. Voqealari hayotiy va tomoshabinlarni oldinga intilishga, yaxshilik umidiga chorlovchi kartina.
— Erkak birov bilan sirlashishi juda qiyin, deyishadi...
— Men ham ichimdagini birovga aytavermayman. Ayniqsa, jiddiyroq sir bo`lsa, uni o`zimdan boshqaga ishonmayman. "O`zingdan boshqa odam bilgan sir — sir emas", degan gap to`g`ri.
Blis:
— Yoshlar internetga qaram bo`lib qolmasligi uchun nima qilish kerak deb o`ylaysiz?
— Hozir texnologiya asri bo`lganligi uchun bu odatiy holga aylanib ulgurgan. Agar inson internetdan kerakli narsalar uchun foydalansa, uning yomon tomonini yo`q.
— O`zingizni boshqalarga o`rnak bo`la oladigan inson deb o`ylaysizmi?
— Aslida har bir insonda o`rnak olish mumkin bo`lgan jihatlar bo`ladi. Men o`zimning gapirgan gapimga javob bera olish odatim boshqalarda ham bo`lishini istardim.
— Bolalikda qaysi multfilmdagi obraz siz uchun qahramon edi?
— "Qora plash" multfilmidagi o`rdak.
Aliya SULAYMANOVA suhbatlashdi
