Zulfiya nomidagi Davlat mukofoti tanlovning ilk bosqichlarida yurtimizdagi oliy o`quv yurtlari, kasb-hunar kollejlari, akademik liseylar, umumta`lim maktablari, maktab-internatlar va Mehribonlik uylaridan 30 mingga yaqin qiz qatnashganligi qizlarimiz orasida mazkur tanlovga qiziqish yildan-yilga ortib borayotganidan dalolatdir.

2019 yil 16 yanvarda o`tkaziladigan tanlovning respublika saralash bosqichiga hududlardan 335 nafar iqtidorli qizlarning ro`yxati taqdim etildi.

Nomzodlar orasida qoraqalpoq, rus, qozoq, tojik, qirg`iz boshqird millatiga mansub vakilalar mavjud.

2019 yildagi Zulfiya nomidagi Davlat komissiyasi tomonidan Tanlovlarni mutlaqo yangi talqinda o`tkazish, ochiqlik va shaffoflikni ta`minlash hamda hamkor tashkilotlar bilan birgalikda tashkil etish bo`yicha takliflar ishlab chiqildi.

Har yili Davlatimiz rahbari tomonidan yuksak e`tirof etilib kelinayotgan Zulfiya nomidagi Davlat mukofoti ta`lim, fan, adabiyot, madaniyat, san`at, sport va jamoatchilik faoliyatida alohida yutuqlarga erishgan o`n to`rt yoshga to`lgan va o`ttiz yoshdan oshmagan iqtidorli qizlarga beriladi.

2000-2018 yillar davomida mazkur mukofotga sazovor bo`lgan qizlarning soni 283 nafarga etib, ularning 65 nafari adabiyot, 79 nafari madaniyat (shundan sportchi kizlar 49), 49 nafari san`at, 24 nafari fan, 43 nafari ta`lim yo`nalishlari bo`yicha taqdirlangan.

Sovrindorlarning 9 nafari O`zbekiston Prezidenti stipendiyasi, 11 nafari Navoiy va Ibn Sino stipendiyalari sovrindorlari, 87 nafari esa Osiyo, jahon va boshqa nufuzli xalqaro musobaqa va tanlovlar g`olibligini qo`lga kiritgan yoshlardir.