Poytaxtimizda Turkiyzabon mamlakatlar transplantologlari hamjamiyati va Turkiya transplantologlari hamjamiyatining hamkorlikdagi III kongressi ish boshladi, bu haqida Sog`liqni saqlash vazirligi Jamoatchilik bilan aloqalar bo`limi xabar berdi...
Mazkur nufuzli tadbirda mamlakatimiz olimlari va shifokorlar bilan bir qatorda AQSh, Kanada, Shveysariya, Avstraliya, Buyuk Britaniya, Turkiya, Ispaniya, Iordaniya, Misr, Bangladesh, Eron, Pokiston, Quvayt, Qatar, Ummon Sultonligi, Suriya, Pokiston. Livan, Ozarbayjon, Qozog`iston, Qirg`iziston, Tojikiston va boshqa mamlakatlardan 120 nafardan ziyod sohaning etakchi mutaxassislari ishtirok etmoqda.
Kongressda Sog`liqni saqlash vaziri Alisher Shadmanov, Jahon transplantologlari jamiyati prezidenti Mexmet Xaberal hamda Jahon sog`liqni saqlash tashkilotining transplantologiya bo`yicha koordinatori Xose Nunes-Penyalar so`zga chiqishdi.
Tadbirda ta`kidlanganidek, zamonaviy tibbiyotda transplantologiya, ya`ni inson a`zolarini ko`chirib o`tkazish amaliyoti joriy etilishi inson salomatligiga og`ir asorat etkazuvchi bir qator xastaliklarni davolashda katta imkoniyatlar yaratmoqda. Har yili dunyoda 136 mingdan ziyod bemorlarda ana shunday transplantologiya amaliyoti bajariladi. Jahonda bo`lgani kabi mamlakatimizda ham tibbiyotning bunday zamonaviy yutuqlarini joriy etishga alohida e`tibor qaratilmoqda.
Jumladan, hozirda Respublika shoshilinch tibbiy yordam ilmiy markazi, Respublika ixtisoslashtirilgan xirurgiya ilmiy-amaliy tibbiyot markazida yaqin qarindoshlardan bemorlarga jigar va buyrak ko`chirib o`tkazish amaliyoti samarali amalga oshirilayapti. Yurtimizda tibbiyot muassasalarida so`nggi ikki yilda birgina buyrak transplantologiyasi amaliyoti uch yuzga yaqin bemorda muvaffaqiyatli o`tkazildi.
Prezidentimiz tashabbusi bilan transplantologiya sohasini yanada rivojlantirishga oid chora-tadbirlar tobora takomillashmoqda. Xususan, Respublika ixtisoslashtirilgan nefrologiya va buyrak transplantasiyasi ilmiy-amaliy tibbiyot markazining tashkil etilgani bu borada muhim qadam bo`ldi. Ayni paytda ushbu yangi tibbiy-ilmiy markazda ham bunday yangi texnologiyalarni joriy etishga tayyorgarlik ko`rilmoqda.
Ushbu yangiliklarni hududlardagi shifo maskanlariga tatbiq etish ham e`tiborda. Joriy yil Namangan viloyat ko`p tarmoqli tibbiyot markazida buyrak transplantasiyasi amaliyoti yo`lga qo`yilgani bu borada yana bir muhim qadam bo`ldi.
Zamonaviy tibbiyotning bunday muhim yutuqlarini tibbiyot amaliyotiga chuqur tatbiq etishda xalqaro aloqalarning o`rni beqiyos. Bu borada olimlarimizning Turkiyaning Anqara shahridagi Bashkent universiteti bilan hamkorligi muhim o`rin tutmoqda. Turkiyalik olimlar va mamlakatimizning etakchi mutaxassislari hamkorlikda ushbu yo`nalishda doimiy mahorat darslari tashkil etmoqda. Bir guruh mutaxassislarimiz xorijda malaka oshirib qaytdi. Mamlakatimiz olimlari jahon va Turkiyzabon mamlakatlar transplantologlari hamjamiyatiga a`zo bo`lgan.
Transplantologiya sohasida echimini kutayotgan vazifalar ham talaygina. Dunyoda, jumladan, mamlakatimizda ham bunday zamonaviy tibbiy yordamga muhtojlar soni yil sayin ko`paymoqda. Ushbu bemorlarga malakali tibbiy yordam ko`rsatish uchun ilm-fan va innovasiya yutuqlarini tibbiyot amaliyotiga izchil tatbiq etish dolzarb ahamiyatga ega. Mazkur kongress bu borada muhim tadbirlardan biridir. Unda transplantologiya sohasida jahon ilm-fani va tibbiyotda erishilayotgan muhim ixtirolar, ilmiy-amaliy yangiliklar yuzasidan tajriba almashiladi. Shu bilan birga, soha oldida turgan ustuvor vazifalar muhokama etiladi.
Ushbu xalqaro kongressning O`zbekistonda tashkil etilishi tibbiyotimizning o`ziga xos yutuqlaridan darak berishi barobarida ilm-fan va innovasiyalarning jadal rivojlanishi, tibbiyot taraqqiyoti uchun ham keng ufqlarni ochadi.
